لاہور ( این این آئی) پاکستان انڈسٹریل اینڈ ٹریڈرز ایسوسی ایشنز فرنٹ (پیاف) نے کہا ہے کہ حکومت توانائی منصوبوں کی بروقت تکمیل کے ساتھ ساتھ موسم گرما و برسات سے قبل بجلی کی ترسیل کے نظام کو بھی اپ گریڈ کرنے کے فوری اقدامات کرے تاکہ عوام بشمول کاروباری طبقہ کو غیر اعلانیہ لوڈ شیڈنگ سے نجات مل سکے ، ملک کا موجودہ بجلی ترسیل نظام انتہائی کمزور ہے۔

ٹرانسمیشن لائنوں پر زیادہ لوڈ ہونیکی وجہ سے اکثر فیڈر ٹرپ کر جاتے ہیں اور بارش کے اوقات میں انڈسٹریل ایریا زمیں ٹرپنگ، کم وولٹیج اور بجلی کی غیر اعلانیہ لوڈشیڈنگ معمول بن چکا ہے جس سے صنعتوں کا پیداواری عمل شدید متاثر ہو رہا ہے،کمزور ڈیلیوری سسٹم کی وجہ سے بجلی صارفین کو مکمل نہیں مل پا رہی۔ چیئرمین پیاف عرفان اقبال شیخ ،سینئر وائس چیئر مین تنویر احمد صوفی اور وائس چیئر مین خواجہ شاہزیب اکرم نے کہا کہ لیسکو کی جانب سے آئندہ موسم گرما میں بلا تعطل بجلی کی فراہمی کی نوید خوش آئند ہے مگر اس کے لئے ضرورہی ہے کہ بجلی کی ترسیل کے ناقص کا نظام کو ادلین ترجیح کے طور پر درست کیا جائے تاکہ آئندہ شدید گرمی میں بوسیدہ ٹرانسمیشن لائنوں کی وجہ سے لوڈ بڑھنے کے باعث غیر اعلانیہ بجلی کی بندش سے چھٹکارا مل سکے اور بجلی صارفین تک باآسانی پہنچائی جا سکے۔انہوںنے کہا کہ حکومت سستی بجلی کے حصول کیلئے پن بجلی منصوبوں پر توجہ دے اور پن بجلی منصوبوں میں قابل عمل منصوبہ کالا باغ ڈیم ہے جو واپڈ ا کے جلد تعمیر ہونے والے منصوبوں میں شامل ہے اس سے نہ صرف3600میگا واٹ اڑھائی روپے یونٹ والی بجلی سسٹم میں شامل ہوگی بلکہ دریائوں میں سارا سال زراعت کے لیے بھی پانی دستیاب رہے گا۔