کراچی ( این این آئی ) سیاسی افق پر بے یقینی کی کیفیت کے باعث پاکستان اسٹاک ایکسچینج میں مندی کا تسلسل جاری ۔ کاروباری ہفتے کے تیسرے روز بدھ کو بھی اتار چڑھاؤ کے بعد مندی کا رحجان رہا اور کے ایس ای 100انڈیکس 44 ہزار کی نفسیاتی سے بھی گر گیا ۔ سرمایہ کاری مالیت میں 21 ارب 4 کروڑ روپے سے زائد کی کمی ۔

کاروباری حجم گذشتہ روز کی نسبت 16.20 فیصد زائد جبکہ 54.78 فیصد حصص کی قیمتوں میں کمی ریکارڈ کی گئی ۔ حکمران خاندان کے خلاف جے آئی ٹی رپورٹ سپریم کورٹ میں پیش کیے جانے کے نتیجے میں مقامی سرمایہ کار گروپ بدھ کو بھی تذبذب کا شکار نظر آ ئے اور اپنے حصص اونے پونے داموں فروخت کرنے کو ترجیح دی ، جس کے باعث کاروبار کا آغاز منفی زون میں ہوا ۔ ٹریڈنگ کے دوران ایک موقع پر کے ایس ای 100 انڈیکس 43 ہزار 27 پوائنٹس کی نچلی سطح پر بھی دیکھا گیا ۔ تاہم حکومتی مالیاتی اداروں اور مقامی بروکریج ہاؤسز کی جانب سے نچلی سطح پر آئی ہوئی قیمتوں پر خریداری کے باعث مارکیٹ میں ریکوری آئی ، جس کے نتیجے میں ٹریڈنگ کے دوران کے ایس ای 100 انڈیکس 43 ہزار 700 کی نفسیاتی حد عبور کر گیا تاہم اتار چڑھاؤ کا سلسلہ سارا دن جاری رہا ۔ مارکیٹ کے اختتام پر کے ایس ای 100 انڈیکس 328.39 پوائنٹس کمی سے 43192.19 پوائنٹس پر بند ہوا ۔ بدھ کو مجموعی طور پر 21 کروڑ 51 لاکھ 69 ہزار 722 شیئرز کا کاروبار ہوا ، جو منگل کی نسبت 3 کروڑ 2 ہزار 280 شیئرز زائد ہے ۔ مجموعی طور پر 345 کمپنیوں کے حصص کا کاروبار ہوا ، جن میں سے 144 کمپنیوں کے حصص کے بھاؤ میں اضافہ ، 189 کمپنیوں کے حصص کے بھاؤ میں کمی جبکہ 12 کمپنیوں کے حصص کے بھاؤ میں استحکام رہا ۔

سرمایہ کاری مالیت میں 21 ارب 4 کروڑ 79 لاکھ 21 ہزار 396 روپے کی کمی ریکارڈ کی گئی جبکہ مجموعی مالیت گھٹ کر 90 کھرب 35 ارب 2 کروڑ 11 لاکھ 21 ہزار 132 روپے ہو گئی ۔ قیمتوں کے اتار چڑھاؤ کے حساب وائتھ پاک لمیٹڈ کے حصص سرفہرست رہے ، جس کے حصص کی قیمت 71.86 روپے اضافے سے 2100.39 روپے اور آئس لینڈ کے حصص کی قیمت 43.76 روپے اضافے سے 920.75 روپے پر بند ہوئی ۔

نمایاں کمی رفحان میظ کے حصص میں ریکارڈ کی گئی ، جس کے حصص کی قیمت 150 روپے کمی سے 6650.00 روپے اور ہینو پاک موٹرز کے حصص کی قیمت 63.39 روپے کمی سے 1300.01 روپے پر بند ہوئی ۔ بدھ کو کے الیکٹرک لمیٹڈ کی سرگرمیاں ایک کروڑ 99 لاکھ 24 ہزار شیئرز کے ساتھ سرفہرست رہیں ۔ جس کے شیئرز کی قیمت 16پیسے اضافے سے 6.76 روپے اور ٹی آر جی پاک لمیٹڈ کی سرگرمیاں ایک کروڑ 47 لاکھ 66 ہزار 500 شیئرز کے ساتھ دوسرے نمبر پر رہیں ،

جس کے شیئرز کی قیمت 1.07 روپے اضافے سے 36.13 روپے پر بند ہوئی ۔ بدھ کو کے ایس سی 30 انڈیکس 152.32 پوائنٹس کمی سے 22747.03 پوائنٹس ، کے ایم آئی 30 انڈیکس 1178.79 پوائنٹس کمی سے 74151.52 پوائنٹس جبکہ کے ایس سی آل شیئرز انڈیکس 74.81 پوائنٹس کمی سے 30874.18 پوائنٹس پر بند ہوا ۔

موضوعات:پاکستان اسٹاک ایکسچینج حصص کی قیمت شیئرز مندی