لاہور ( این این آئی)ٹیکنیکل ایجوکیشن اینڈ ووکیشنل اتھارٹی( ٹیوٹا) ایک سال کے دوران15ہزار نوجوانوں کو چینی زبان کورس سیکھائے گی، لوگوں کی دلچسپی کو ملحوظ خاطر رکھتے ہوئے چینی زبان کورس کو صوبہ کے دیگر شہروں میں آئندہ ماہ شروع کیا جا رہاہے جن میں گجرات، شیخوپورہ، اوکاڑہ، قصور، ساہیوال،ٹیکسلا، سرگودھا، لیہ، خانیوال، بہاولپور، رحیم یار خان اورڈی جی خان شامل ہیں جبکہ لاہور، گوجرانوالہ، سیالکوٹ، فیصل آباد، ملتان، راوالپنڈی میں پہلے سے ہی کلاسز کامیابی سے جاری ہیں۔ان خیالات کا اظہار چےئرپرسن ٹیوٹاعرفان قیصر شیخ نے چینی زبان کورس کی کلاسز کے حوالے سے جائزہ کاراجلاس میں کیا ۔چیف آپریٹنگ آفیسر جواد احمد قریشی، اخترعباس بھروانہ، عامر عزیز، اظہر اقبال شاد، حامد غنی انجم اور دیگر افسران بھی اس موقع پر موجود تھے۔عرفان قیصر شیخ نے کہا کہ چینی سرمایہ کاروں کو چینی زبان میں مہارت رکھنے والے پاکستانی نوجوانوں کی اشد ضرورت ہے۔ ٹیوٹا نے اس مقصد کو مد نظر رکھتے ہوئے چینی زبان کی کلاسز کا دائرہ کار 18شہروں تک پھیلا رہی ہے ۔ ان شہروں میں کامیاب آغاز کے بعد اگلے مرحلے میں صوبہ بھر کے دیگر شہروں میں بھی شروع کیا جائے گاکیونکہ دیگرشہروں میں بھی چینی زبان کورس کے آغاز کیلئے ٹیوٹا سیکرٹریٹ سے نوجوان رابطہ کر رہے ہیں۔ چینی زبان میں مہارت پاکستان میں چینی کمپنیوں اور چین میں نوکریوں کے مواقع حاصل کرنے والے ان نوجوانوں کے لئے مدد گار ثابت ہوگی ۔چیئر پرسن ٹیوٹا نے کہا کہ چینی زبان پر عبور حاصل کرنے پر دونوں ممالک کے درمیان بات چیت کی رکاوٹوں پر قابو پانے میں مدد ملے گی۔اس کورس میں داخلے کیلئے اہلیت میٹرک ہے ۔لینگویج کورسزکو شروع کرنے کا مقصد چینی مارکیٹ میں پاکستان کی تربیت یافتہ ہنر مند افرادی قوت کو قابل اور زیادہ مقبول بنانا ہے ۔چین کا پاکستان کے ساتھ معاشی اور اقتصادی تعاون عوام کیلئے خوشحالی کی نئی راہیں ہموار کرے گا۔

موضوعات:ٹیوٹا