لاہور ( این این آئی) ٹیکنیکل ایجوکیشن اینڈ ووکیشنل ٹریننگ اتھارٹی ( ٹیوٹا ) نے کسٹمر سپورٹ ایگزیکٹیوزکی تربیت فراہم کرنے کیلئے جدید شارٹ کورس متعارف کروا دیا ہے، آئی بیکس گلوبل کے تعاون سے کسٹمر سپورٹ ایگزیکٹیو (ڈومیسٹک) کورس کو گورنمنٹ کالج آف ٹیکنالوجی ریلوے روڈ اور گورنمنٹ ٹیکنیکل ٹریننگ انسٹی ٹیوٹ ٹاؤن شپ میں شروع کئے گئے ہیں۔ان خیا لات کا اظہار چیئر پرسن ٹیوٹا عرفان قیصر شیخ نے اجلاس سے خطاب کرتے ہوئے کیا۔اس موقع پر چیف آپریٹنگ آفیسر جواد احمد قریشی، حامد غنی انجم، اختر عباس بھروانہ، عامر عزیز اور دیگر افسران موجود تھے۔عرفان قیصر شیخ نے کہا کہ پہلے مرحلے میں کورس پاس کرنے والے تمام نوجوانوں کو آئی بیکس گلوبل نے روزگار فراہم کر دیا ہے۔ تمام تر اقدامات وزیر اعلی پنجاب محمد شہبا ز شریف کے ویژن کے مطابق ہنر مند نوجوان اور خوشحال پنجاب کے نعرہ کو عملی جامہ پہنا نے کیلئے کئے جا رہے ہیں۔بی اے پاس اور بہترین ابلاغ ، تجزیاتی اور کمپیوٹر میں مہارت رکھنے والوں کو داخلے کیلئے ترجیح دی جاتی ہے۔چیئر پرسن ٹیوٹا نے مزیدکہا کہ کورس میں کامیاب نوجوانوں کو ملکی و بین الاقوامی سطح پر بھی یقینی روزگار کے مواقع ملیں گے۔ٹیوٹا کو متحرک ادارہ بناکرہنر مند افرادی قوت کی قومی ترقی میں شرکت کو یقینی بنانے کیلئے اقدامات کئے جار ہے ہیں تاکہ ملک میں غربت اور بیروزگاری کے مسائل کو حل کرنے میں ٹیوٹا اپنا کردار ادا کرے۔‎