اسلام آباد (این این آئی)نیشنل الیکٹرک پاور ریگولیٹری اتھارٹی(نیپرا) نے ہوا سے بجلی پیدا کرنے کے 50میگاواٹ کے منصوبے کیلئے جنریشن لائسنس جاری کرنے کیلئے درخواست منظور کرلی ہے۔ میڈیا رپورٹ کے مطابق2006ء میں ایران کی کمپنی سونیئر کو نے جھم پیر میں 50 میگاواٹ کا منصوبہ لگانے میں دلچسپی کا اظہارکیا تھا۔ 2010ء میں ایران پاک پاور پرائیویٹ لمیٹڈ نے سندھ سرمایہ کاری بورڈ کے ساتھ ایک مفاہمت کی یاداشت پر دستخط کئے تھے جس کے بعد سروے اور زمین کی دستیابی کے عمل کا آغاز ہوا، سندھ حکومت نے 2011ء میں زمین الاٹ کردی لیکن زمین کے قبضے اوردیگر معاملات کو حتمی شکل نہیں دی جاسکی جس کی وجہ سے یہ منصوبہ تاخیر کا شکار ہوگیا۔بعد ازاں اکتوبر2013ء میں 10 سال کی تاخیرکے بعد کمپنی نے اب دوبارہ جنریشن لائسنس کیلئے درخواست جمع کرادی ہے ، منصوبے سے اکتوبر2017ء میں پیداوار شروع ہونے کا امکان ہے اور اس پر لاگت کا مجموعی تخمینہ 11کروڑ28لاکھ ڈالر لگایا گیا ہے۔