کراچی(نیوز ڈیسک)بزنس مین گروپ کے چیئرمین اور سابق صدر کراچی چیمبر آف کامرس اینڈ انڈسٹری سراج قاسم تیلی نے کہا ہے کہ کے سی سی آئی کے زیر اہتمام 13ویں سالانہ ” مائی کراچی“ نمائش2016 کی تیاریاں بھرپور طریقے سے جاری ہیں۔ نمائش ایکسپو سینٹر کراچی میں بھرپور آب وتاب کے ساتھ 25 مارچ2016کو شروع ہو کر27مارچ 2016کو اختتام پذیر ہو گی۔ اگلے برس نمائش میں7سے8لاکھ افرد کی شرکت متوقع ہے۔ اس امر کا اعلان انہوں نے جمعہ کو کے سی سی آئی آڈیٹوریم میں منعقدہ پریس کانفرنس میں کیا۔ اس موقع پر کے سی سی آئی کے صدر یونس محمد بشیر،سینئر نائب صدر ضیاءاحمد خان،نائب صدر محمد نعیم شریف، چیئرمین خصوصی کمیٹی برائے’مائی کراچی‘ نمائش محمد ادریس، ڈپٹی چیئرمین خصوصی کمیٹی شمیم احمد فرپو، سابق صدورمحمد ہارون اگر، اے کیو خلیل، عبداللہ ذکی،افتخار احمد وہرہ اورمنیجنگ کمیٹی کے اراکین بھی موجود تھے۔سراج قاسم تیلی نے کہا کہ نمائش کے انعقاد کا مقصد کراچی کاسافٹ اور مثبت تاثر اجاگر کرنا ہے۔ کراچی چیمبر گزشتہ 13برس سے کامیابی کے ساتھ ’مائی کراچی‘ نمائش کا بلا تعطل انعقاد کررہا ہے، جس میں تاجر برادری، سفارتکاروں، غیر ملکی کمپنیوں سمیت کراچی کی عوام کی بھرپور شرکت یقینی بنانے کی ہر ممکن کوشش کی گئی۔