اسلام آباد(نیوز ڈیسک) وفاق اور سندھ کے درمیان ملک میں ایئرپورٹس پر بیرون ملک سفر کرنے والوں پر عائد کردہ ٹرمینل ٹیکس پر تنازع شدت اختیار کر گیا، سندھ حکومت نے وفاق پر واضح کردیا ہے کہ صوبائی حکومت نے ایئرپورٹ پر بیرون ملک سفر کرنے والوں پر کسی قسم کا ٹرمینل ٹیکس عائد نہیں کیا۔”قومی اخبار‘ کو دستیاب دستاویز کے مطابق سندھ ریونیو بورڈ (ایس آر بی)کی جانب سے وفاق کو خط لکھا گیا جس میں 14ستمبر 2015کو فنانس ڈویڑن اسلام آباد میں منعقدہ وزرائے خزانہ اجلاس کے منٹس کا حوالہ دیا گیا ہے کہ منٹس آف میٹنگ کے پیراگراف نمبر 10میں کہا گیاکہ سندھ حکومت کی جانب سے اوور سیز پاکستانیوں پر ٹیکس عائد کیا گیا ہے اورپیرا گراف نمبر 11 میں کہا گیا کہ سندھ حکومت انٹرنیشنل ٹریول پر عائد کردہ ٹیکس پر نظر ثانی اور اسے ختم بھی کرسکتی ہے۔ خط میں کہا گیاکہ مذکورہ اجلاس کے منٹس میں سندھ کی جانب سے انٹرنیشنل ٹریول پر ٹیکس عائد کرنے کا بتایا گیا ہے جبکہ سندھ حکومت کی طرف سے ایئر پورٹ پر انٹرنیشنل ٹریول کیلئے ایسا کوئی ٹیکس عائد نہیں کیا گیا۔لہٰذا فنانس ڈویڑن سے درخواست ہے کہ سندھ ریونیو بورڈ کو سندھ سیلز ٹیکس ا?ن سروسز ایکٹ 2011 کی اس شق کے بارے میں آگاہ کیا جائے جس کی تشریح کو وفاق نے بنیاد بناتے ہوئے منٹس آف میٹنگ میں حوالہ دیا ہے کہ سندھ حکومت کی جانب سے اوورسیز پاکستانیوں و ایئرپورٹ پر انٹرنیشنل ٹریول کے لیے مسافروں پر ٹرمینل ٹیکس عائد کیا ہے کیونکہ سندھ حکومت نے ایسا کوئی ٹرمینل ٹیکس عائد نہیں کیا۔