کراچی(نیوزڈیسک)بینک ٹرانزیکشن پرعائد ودہولڈنگ ٹیکس کی وجہ سے تجارتی شعبوں کی امریکی ڈالر میں باہمی لین دین اور40 ارب روپے کے نئے ٹیکس عائد ہونے پرملکی معیشت کے حوالے سے منفی قیاس آرائیوں وافواہوں کے باعث اوپن مارکیٹ میںامریکی ڈالر کی قدربڑھ کر 108 روپے کے قریب پہنچ گئی۔مارکیٹ میں اگرچہ قیمت 107.40 روپے ہے تاہم مذکورہ قیمت پرڈالر دستیاب نہیں اور طلب گاروں کو ڈالر 107.60 تا107.80 روپے کے حساب سے ڈالرمل سکا، اس طرح رواں ہفتے کے ابتدائی 3 یوم کے دوران ڈالر کی قدر میں 40 تا80 پیسے کا اضافہ ہوچکا ہے، انٹربینک مارکیٹ میں بھی ڈالر کی قدر بڑھ کر105.57 روپے پر آگئی ہے۔اوپن مارکیٹ ذرائع کے مطابق حکومت کی جانب سے منی بجٹ کی منظوری کے بعد امریکی ڈالر کی ڈیمانڈ میں اچانک اضافہ ہوگیا ہے اور لوگوں میں یہ تاثر ابھر کر سامنے آرہا ہے کہ حکومت کمزور معاشی حالات کے پیش نظر اضافی ٹیکسز عائد کررہی ہے اور کمزورمعیشت کی صورت میں امریکی ڈالر کی نسبت روپے کی قدرمزید تنزلی کا شکار رہے گی، انہی خدشات کے سبب سرمایہ کاروں نے ڈالر کی خریداری کرکے ہولڈ کرنا شروع کردیا ہے تاہم اوپن مارکیٹ میں طلب کے مطابق ڈالر کی رسد نہیں، ان عوامل کے باعث خطرہ ہے کہ امریکی ڈالر نئے ریکارڈ قائم کریگا۔