اسلام آباد(نیوزڈیسک) ود ہولڈنگ ٹیکس کے معاملے پر ایف بی آر حکام اور تاجروں کے درمیان مذاکرات اسلام آباد میں ہوئے، پیش رفت نہ ہونے پر آل پاکستان انجمن تاجران کا خالد پرویز گروپ مذاکرات سے اٹھ کر چلا گیا، بعد میں وزیر خزانہ اسحاق ڈار بھی مذاکرات میں شریک ہوگئے۔ طویل بات چیت کے بعد میڈیا سے گفتگو کرتے ہوئے وزیر خزانہ اسحاق ڈار نے کہا کہ حکومت اس معاملے میں سنجیدہ ہے۔ تاجروں نے وِد ہولڈنگ ٹیکس کے نفاذ پر اتفاق کیا ہے، مذاکرات میں پیش رفت ہوئی ہے۔ مزید بات چیت بدھ کو ہو گی، اس موقع پر گفتگو کرتے ہوئے تاجر اتحاد کے رہنما اجمل بلوچ نے کہا کہ وِد ہولڈنگ ٹیکس کے معاملے پر فیصلے کے قریب پہنچ گئے ہیں، تمام معاملات پر بات ہوئی ہے۔ حکومت نے تاجروں کے مسائل حل کرنے کی یقین دہانی کرائی ہے۔ بدھ کو ملک بھر کے تاجروں کو خوشخبری دیں گے۔ ادھر آل پاکستان انجمن تاجران کے صدر خالد پرویز نے پریس کانفرنس سے خطاب کرتے ہوئے کہا کہ وہ تاجروں کے حقیقی نمائندے کی حیثیت سے ود ہولڈنگ ٹیکس کو یکسر مسترد کرتے ہیں۔ ان کا کہنا تھا کہ وزیر اعلیٰ پنجاب کی خواہش پر وفاقی وزیر خزانہ اسحاق ڈار سے ملاقات کی اور ہمارے ساتھ بارگینگ کرنے کی کوشش کی گئی۔ اسحاق ڈار نے وِد ہولڈنگ ٹیکس ختم نہ کرنے کا فیصلہ کیا ہے اس لئے ہمارے مؤقف میں کوئی تبدیلی نہیں آئی، آل پاکستان انجمن تاجران سندھ، خیبر پختونخوا اور بلوچستان کےنمائندے بھی اس موقع پر موجود تھے۔ تاجر رہنماؤں کا کہنا تھا کہ آئندہ کے لائحہ عمل کا اعلان چودہ اکتوبر کو کوئٹہ کے اجلاس میں کیا جائے گا۔