اسلام آباد (نیوزڈیسک) عوامی جمہوریہ چین کی 66 ویں قومی سالانہ دن کے موقع پر اسلام آباد میں متعین جوانسال چینی سفیر سن وائے ڈونگ نے اعلان کیا ہے کہ چین پاک اقتصادی راہداری کی تیز رفتار تکمیل کے لئے اس اکنامک ڈور کے متعلق پاکستان کے ہنرمندنیم ہنر مند افراد پر چین ویزہ پابندیاں نرم کرے گا۔ لاہور میں چینی قونصل خانہ کام شروع کر دے گا۔ چین کی قومی ائیر لائین چائنا ائیر بیجنگ سے اسلام آباد کی براہ راست پرواز بھی شروع کرے گی۔ وہ پیر کی شب اپنے ملک کے چھیاسٹھویں یوم آزادی کی تقریب سے خطاب کر رہے تھے۔ تقریب میں چینی قومی دن کی چھیاسٹھویں سالگرہ کا کیک صدر مملکت ممنون حسین نے تالیوں کی گونج میں کاٹا۔ روزنامہ جنگ کے صحافی حنیف خالد کی رپورٹ کے مطابق اس موقع پر وفاقی وزیر منصوبہ بندی ترقیات احسن اقبال وفاقی وزیر صحت سائرہ افضل تارڑ ، پاکستان کی مسلح افواج کے سینئر عہدیدار، سابق نگران وزیراعظم چوہدری شجاعت حسین، پارلیمنٹ کی CPECکے چیئرمین مشاہد حسین ، پلاننگ کمیشن کے سابق ڈپٹی چیئرمین محمد اکرم ذکی، سپریم کورٹ بار ایسوسی ایشن کے سابق صدر محمد اکرم شیخ، سابق نائب صدر بلال احمد ایڈووکیٹ ، سابق گورنر پنجاب لطیف کھوسہ، نیب کے چیئرمین قمر زمان چوہدری سمیت سینئر سول و فوجی بیوروکریٹ، ارکان پارلیمنٹ ، جڑواں شہروں کے ممبروں کے سابق و موجودہ صدور، عہدیدار، سابق سیکرٹری جنرل وزارت خارجہ اکرم شیخ اور ملک کی دیگر اعلیٰ شخصیات کے علاوہ درجنوں غیر ملکی سفیروں نے شرکت کی۔ صدر مملکت ممنون حسین نے خلاف توقع چینی سفیر کی تقریر اور کیک کاٹنے کے بعد مختصر خطاب بھی کیا۔ چینی سفیر نے اپنے خطاب میں بتایا کہ چھیاسٹھ سال قبل چینی قوم نے جاپان کی حملہ آور فوج کو شکست دیکر آزادی حاصل کی۔ گزشتہ 3 عشروں میں چین کی حالت ہی بدل چکی ہے۔ چین دنیا کی ایک اہم اقتصادی قوت ہے۔ چین کے صدر کی گزشتہ اپریل کے دورہ اسلام آباد سے پاک چین دوستی ایک تاریخ ساز سٹریٹجک پارٹرنر شپ میں تبدیل ہوگئی ہے۔ CPECدونوں ملکوں کے عوام کی ترقی خوشحالی، سلامتی یکجہتی کی ضمانت بنے گا۔ چند ہفتے قبل بیچنگ میں چین کی مسلح افواج کی تاریخ ساز پریڈ میں جب پاکستانی مسلح افواج کے دستے گزرے تو چین کے صدر اور دوسری اعلیٰ شخصیات نے کھڑے ہوکر مسلسل تالیاں بچا کر اپنے برادر ہمسایہ دوست ملک کے ساتھ اپنے انمٹ اخوت کے رشتوں کا دنیا بھر کے سامنے اظہار کر دیا۔ اس سے ثابت ہوگیا کہ چین اور پاکستان کے عوام یک جان دو قالب ہیں، تقریب کے آخر میں سنگ کیانگ کے چین ثقافتی طائفے نےمہیرا لعقول فن کا مظاہرہ کیا۔
مزید پڑھئے: آئی ایم ایف نے پاکستان کیلئے 50کروڑ ڈالر کی منظوری دیدی
