کراچی (نیوزڈیسک)ایف بی آر نے انکم ٹیکس ڈپارٹمنٹ میں انفرادی رجسٹریشن کیلئے موبائل فون سم اور ای میل ایڈریس لازم قرار دے دیا ہے۔ تفصیلات کے مطابق آر ٹی اوز کراچی کی جانب سے انکم ٹیکس بلڈنگ میں لگائے گئے ہدایت نامے کے تحت انکم ٹیکس میں سیلری یا نان سیلری افراد کیلئے لازم قرار دیا گیا ہے کہ وہ نئی رجسٹریشن یعنی ریٹرن جمع کرانے کے لیے ذاتی طور پر حاضر ہوکر بائیو میٹرک تصدیق کرائیں اس کے ساتھ قومی شناختی کارڈ نمبر کے ساتھ موبائل فون کی وہ سم بھی لانا لازم ہوگا جوکہ اس کے سی این آئی سی نمبر پر جاری ہوئی ہے انکم ٹیکس رجسٹریشن کیلئے ای میل ایڈریس بینک اکاؤنٹ سرٹیفکیٹ کے ساتھ کاروبار کی شکل میں جس جگہ کا کاروبار کررہا ہے اس جگہ کی ملکیت یا کرایہ داری کے ثبوت نیز 3ماہ کے یوٹیلیٹی بلز بھی جمع کرانے لازم ہونگے۔ ٹیکس ماہرین کا کہنا ہے کہ موبائل سم اور ای میل کی شرط سے بزرگ اور ناخواندہ افراد کو پریشانی کا سامنا کرنا پڑے گا ایسے بے شمار بزرگ افراد جن کی آمدنی قابل ٹیکس ہے مگر وہ سم یا ای میل ایڈریس استعمال نہیں کرتے ان کیلئے ریٹرن جمع کرانا ناممکن بنا دیا گیا ہے اس طرح کے اقدامات کا مقصد لوگوں کو ٹیکس نیٹ میں آنے سے روکنا ہے ایف بی آر کے ذمہ داروں کو اس طرح کے معاملات کا نوٹس لینا چاہئے۔