فیصل آباد (نیوز ڈیسک)حکومت پنجاب نے متوقع طور پر 19جون بروز جمعہ سے شروع ہونےوالے رمضان المبارک کے مقدس مہینہ کے دورا ن معمول کے جمعہ و اتوار بازاروں سمیت روزانہ کی بنیاد پر رمضان بازار لگانے کی ہدایت کی ہے اور تمام ڈویژنل کمشنر ز ، ڈسٹرکٹ کوآرڈینیشن آفیسرز ، چیئر مینز و ایڈمنسٹریٹرز مارکیٹ کمیٹیوں کے نام جاری کئے گئے مراسلہ میں کہا گیا ہے کہ تمام شہروں کے مرکزی مقامات پر19جون سے متوقع طورپرشروع ہونےوالے رمضان المبارک کے دوران سستے بازار لگانے کےلئے فوری اقدامات کئے جائیں جہاں چینی ، آٹے ، گھی ، چاول ، دالوں ، سبزیوں ،گوشت اور پھلوں سمیت تمام معیاری اشیائے ضروریہ سستے داموں پر مہیا کی جائیں۔ فیصل آباد ڈویژنل انتظامیہ کے ترجمان نے اے پی پی کو بتا یا کہ تمام پرائس مجسٹریٹوں کو بھی ہدایت کی گئی ہے کہ وہ ماہ صیام کے دوران روزانہ رمضان بازاروں اور دیگر مارکیٹوں کی اچانک چیکنگ کریں تاکہ ناجائز منافع خوری ، ذخیرہ اندوزی اور ملاوٹ کرنےوالوں کی حوصلہ شکنی ہو سکے۔ انہوںنے بتا یا کہ ڈسٹرکٹ پرائس کنٹرول کمیٹیوں کو بھی ہدایت کی گئی ہے کہ وہ رمضان بازاروں میں اپنے مستقل کیمپ قائم کرنے کیلئے اقدامات کر یں تاکہ کسی بھی شکایت کی صورت میں صارفین ان سے فوری رابطہ کر سکیں۔