فیصل آباد(نیوز ڈیسک) فیصل آباد، سیالکوٹ اور پاکستان کے دیگر علاقوں سے تعلق رکھنے والے لیدر مینو فیکچررز اینڈ ایکسپورٹرز نے رواں مالی سال کے دوران جولائی2014 سے لے کر مئی2015 تک 11 ماہ کے دوران77 کروڑ ڈالرسے زائد مالیت کا چمڑا برآمد کیا ہے جس میں گائے، بھینس، بچھڑے، بکرے، چھترے اور دیگر اقسام کے جانوروں و مویشیوں کا چمڑا بھی شامل ہے جو بین الاقوامی سطح پر لیدر جیکٹس، لیدر شوز، پرس اور چمڑے کی دیگر مصنوعات کی تیاری میں استعمال کیا جاتا ہے۔
نیز بیرونی ممالک پاکستانی چمڑے سے مختلف لیدر پروڈکٹس تیار کر کے اس کی دنیا بھر میں فروخت کے ذریعے سالانہ اربوں ڈالر حاصل کرتے ہیں۔ پاکستان لید ر مینوفیکچررز اینڈ ایکسپورٹرز ایسوسی ایشن کے ذرائع نے بتا یا کہ گزشتہ سال یکم جولائی2013 سے لے کر31 مئی 2014 تک لیدر ایکسپورٹ کی مد میں برآمدات کا حجم57 کروڑ50 لاکھ ڈالر تھا۔
انہوں نے بتایا کہ صرف رواںماہ مئی2015 کے دوران10 کروڑ ڈالر مالیت کا چمڑا بیرون ملک ایکسپورٹ کیا گیا۔انہوںنے کہا کہ حکومت لائیو اسٹاک فارمرز کو تمام ممکن سہولتیں فراہم کر رہی ہے تاکہ پاکستانی عوام کے لیے گوشت کی ضروریات پوری کرنے کے علاوہ اضافی گوشت اور اس کی دیگر مصنوعات سمیت چمڑے کی برآمد سے قیمتی زر مبادلہ حاصل کیا جا سکے اور ملک کو معاشی استحکام سے ہمکنار کرنے میں مدد مل سکے۔