اسلام آباد (نیوز ڈیسک) الیکشن کمیشن نے سیاسی پارٹیوں اور بلدیاتی امیدواروں کی سہولت کیلئے پارٹی ٹکٹ پیش کرنے کی تاریخ ستمبر سے بڑھا کر 30 ستمبر کردی ہے۔ پارٹی ٹکٹ پارٹی سربراہ یا ان کا نامزد کردہ عہدیدار ہی جاری کر سکے گا۔ یاد رہے کہ پنجاب اور سندھ میں بلدیاتی انتخابات کیلئے کاغذات نامزدگی جمع کرانے کی آخری تاریخ 11ستمبر ہے اور پارٹی ٹکٹ بھی پہلے سے جاری الیکشن شیڈول کے مطابق 11 ستمبر تک جمع کرائے جانے تھے۔ علاوہ ازیں پنجاب میں بلدیاتی انتخابات کے پہلے مرحلے کیلئے کاغذات نامزدگی جمع کرانے کا سلسلہ جاری ہے، کاعذات نامزدگی جمع کرانے کاعمل پیر کو شروع ہوگیا تھا۔ پنجاب کے جن اضلاع میں پہلے مر حلے میں انتخابات ہوں گے ان میں لودھراں، وہاڑی، اوکاڑہ، پاک پتن، بہاولنگر، فیصل آباد، بھکر، لاہور، قصور، ننکانہ صاحب، گجرات اور چکوال شامل ہیں۔ ان اضلاع میں جن امیدواروں کا انتخاب ہوگا ان میں یونین کونسل کے ارکان، چیئرمین اور وائس چیئرمین یا وارڈ کے ارکان شامل ہیں۔علاوہ ازیں پنجاب کی اپوزیشن جماعتوں نے بلدیاتی انتخابات میں الیکشن کمشن سے فوج اور رینجرز کی تعیناتی کا مطالبہ کردیا۔ منگل کو اپوزیشن جماعتوں کی طرف سے الیکشن کمشن کو باقاعدہ درخواست دی گئی جس میں مطالبہ کیا گیا کہ بلدیاتی انتخابات میں فوج اور رینجرز کو تعینات کیا جائے۔