لاہور(این این آئی)پاکستان تحریک انصاف نے پنجاب اسمبلی میں اعتماد کے ووٹ یا اسمبلی کی تحلیل میں تاخیر کی صورت میں نئی حکمت عملی پر مشاورت کی ہے۔ذرائع کے حوالے سے بتایا گیا ہے کہ چیئرمین پاکستان تحریک عمران خان کا کہنا ہے کہ اگر اسمبلی کی تحلیل میں تاخیر ہوئی تو ہمارے ارکان استعفے دے کر پنجاب اسمبلی سے باہر آجائیں گے۔

عمران خان نے پارٹی ذمہ داران سے کہا ہے کہ 11 جنوری سے پہلے وزیر اعلی کے اعتماد کے ووٹ کے عمل کو یقینی بنائیں، پارٹی ارکان مزید اسمبلی میں نہیں رہنا چاہتے۔ذرائع کے مطابق عمران نے فیصلہ کیا ہے کہ اگر اسمبلی کی تحلیل میں کوئی رکاوٹ پیدا کی گئی تو پھر ہمارے ایم پی ایز مستعفی ہوجائیں گے۔پارٹی کی سینئر لیڈرشپ نے چیئرمین پاکستان تحریک انصاف عمران خان کو ارکان اسمبلی سے رابطوں کے بارے بریفنگ دیتے ہوئے کہا کہ آزاد رکن اسمبلی بلال وڑائچ اعتماد کے ووٹ میں ساتھ دینے کا اعلان کر چکے ہیں، مزید 2 آزاد ارکان اسمبلی سے حمایت کے لئے بات چیت چل رہی ہے۔ایک ذرائع کے مطابق مسلم لیگ(ق) اور تحریک انصاف میں سب اچھا نہیں ہے اور دونوں جماعتوں میں تعاون کے فقدان کے بعد اسمبلی کی تحلیل اور اعتماد کے ووٹ کا معاملہ التواء کا شکار ہو سکتا ہے تاہم تحریک انصاف مزید التواء کے حق میں نہیں ہے۔ ذرائع کے مطابق وزیراعلی پرویزالٰہی کے بیانات پر پی ٹی آئی میں تشویش پائی جاتی ہے اور اس کا اظہار بھی کیا جارہا ہے۔