کوئٹہ( این این آئی) بلوچستان کی وادی زیارت میں منگل کو رواں موسم سرما کا سرد ترین دن رکارڈ کیاگیاہے۔گزشتہ ہفتے ہلکی بارش اور برفباری کے بعد سرد ہوائیں چلنے کے باعث وادی زیارت اور ملحقہ علاقے شدید سردی کی لپیٹ میں ہیں،محکمہ موسمیات کے مطابق

منگل کو وادی زیارت میں کم سے کم درجہ حرارت منفی 11 ڈگری سینٹی گریڈرکارڈ رکارڈ کیا گیا جو رواں موسم سرما کا کم سے کم درجہ حرارت ہے اس طرح زیارت میں سرد ترین دن ہے،اس سے قبل رواں سردیوں کے دوران وادی زیارت میں کم سے کم درجہ حرارت منفی 8 سے منفی 9 تک رکارڈ کیاگیاتھا،زیارت کی وادی کے اطراف میں پہاڑوں کی چوٹیاں برف سے ڈھکی ہوئی ہیں،دوسری جانب زیارت کے یخ بستہ موسم میں سوئی گیس پریشر میں کمی کا شدید مسئلہ درپیش ہے جس کی وجہ سے وادی میں لوگوں کوگھروں کو گرم رکھنے اور کھانا پکانے کے حوالے سے شدید مشکلات کا سامناہے،گیس پریشر نہ ہونے سے متبادل ایندھن کے طور پر وادی زیارت کے مکینوں کی جانب سے کوئلے کے علاوہ صنوبر اور دیگر درختوں کی خشک لکڑیاں جلانے کی اطلاعات موصول ہورہی ہیں،مقامی ذرائع کے مطابق زیارت اور ملحقہ علاقوں میں گیس پریشر نہ ہونے سے بعض لوگ صنوبر کے درخت کاٹ کر سکھالیتے ہیں اور بعد میں ان کی لکڑیوں کو بطورایندھن استعمال کرتے ہیں۔