امریکہ میں موسم سرما کا بدترین طوفان، کئی ریاستوں میں درجہ حرارت منفی 45 ریکارڈ۔پروازیں تاخیر کا شکار ،کئی علاقوں میں سیلابی صورتحال

واشنگٹن (این این آئی )امریکا میں موسم سرما کا بدترین طوفان جاری ہے، سرد ہواں سے ریاست مونٹانا، جنوبی ڈکوٹا، وائیومنگ میں درجہ حرارت منفی 45 ریکارڈ کیا گیا۔برفانی طوفان کی وجہ سے امریکا بھر میں 8 ہزار سے زائد پروازیں منسوخ کر دی گئی ہیں جبکہ 25 ہزار سے زائد تاخیر کا شکار ہیں۔ طوفان سے مختلف حادثات میں ہلاک افراد کی تعداد 19 ہوگئی، سڑکوں پر پھسلن سے درجنوں گاڑیوں کو حادثات پیش آئے، 15 لاکھ سے زیادہ صارفین بجلی سے محروم ہیں۔نیویارک، جارجیا، کینٹکی سمیت کئی امریکی ریاستوں میں ہنگامی حالت نافذ کر دی گئی ہے۔محکمہ موسمیات کے مطابق مشرقی ریاستوں میں اگلے 24گھنٹے تک سردی کی شدت برقرار رہے گی۔امریکی میڈیا کا کہنا ہے کہ کئی مشرقی ریاستوں میں دہائیوں بعد سرد ترین کرسمس منایاگیا۔طوفان کے باعث نیو انگلینڈ، نیویارک، نیو جرسی کے ساحلی علاقوں میں سیلابی صورتحال پیدا ہوگئی۔نیویارک سٹی میں ساحلی علاقوں کی سڑکیں زیرآب آگئیں، گاڑیاں بھی پانی میں ڈوب گئیں۔متاثرہ ساحلی علاقوں سے لوگوں کو محفوظ مقامات پر منتقل ہونے کی ہدایات جاری کر دی گئی ہیں۔