کراچی(این این آئی)قومی کرکٹ ٹیم کے سابق کپتان معین خان نے پاکستان کرکٹ بورڈ(پی سی بی)انتظامیہ کی قیادت میں تبدیلی پر تبصرہ کرتے ہوئے کہا ہے کہ رمیز راجا اکیلے بورڈ کے معاملات چلا رہے تھے، بدقسمتی سے ان سے کوئی خوش نہیں تھا۔بورڈ میں اہم پیشرفت کے بعد میڈیا سے بات کرتے ہوئے معین خان نے کہا کہ سابق کرکٹر اور کمنٹیٹر رمیز راجا کو خود کو ثابت کرنے کا بہت موقع ملا لیکن بدقسمتی سے کوئی ان سے خوش نہیں تھا۔ وہ اکیلے ہی پی سی بی کے معاملات چلا رہے تھے۔انہوں نے کہا کہ نجم سیٹھی کے آنے سے بورڈ میں بہتری کی امیدیں ہیں، وہ سمجھدار ہیں اور پہلے بھی بورڈ کے سربراہ رہ چکے ہیں۔