اسلام آباد (این این آئی)قومی اسمبلی سے استعفوں کے باوجود تحریک انصاف کے متعدد ایم این ایز کاتاحال سرکاری گھروں پرقابض ہونے انکشاف ہوا۔نجی ٹی وی کے مطابق پبلک ورکس ڈیپارٹمنٹ اور وزارت ہاؤسنگ نے تفصیلات وزیراعظم آفس کو جمع کرادیں۔ دستاویزات کے مطابق تحریک انصاف کے اراکین قومی اسمبلی

نے استعفے تو دے دیے مگر سرکاری مراعات نہ چھوڑیں،ساتھ ہی سیکیورٹی کا بھی فائدہ اٹھا رہے ہیں۔رپورٹ کے مطابق مجموعی طور پر تحریک انصاف کے 94 مستعفی اراکین سرکاری گھروں میں مقیم ہیں جن میں سے 10 اراکین استعفے منظور ہونے کے باوجود پارلیمنٹ لاجز میں رہائش پزیر ہیں۔دوسری جانب سابق وفاقی وزیر فواد چوہدری اور نورالحق قادری اب تک منسٹر انکلیو میں رہائش میں مقیم ہیں۔ دونوں رہنماؤں نے سابق وزرا کی حیثیت سے ملنے والے گھر خالی نہیں کیے۔قومی اسمبلی کے 13 ملازمین سابق اسپیکر اسد قیصر کے ساتھ اب بھی ڈیوٹی پر موجود ہیں جبکہ اسمبلی سیکریٹریٹ کے 6 ڈرائیور اب تک اسد قیصر کے زیر استعمال ہیں۔رپورٹ کے مطابق تحریک انصاف کے 41 ارکان قومی اسمبلی نے اب تک سرکاری سیکیورٹی نہ چھوڑی۔ علی امین گنڈا پور کے ساتھ کے پی پولیس کے 36 اور مراد سعید کے ساتھ 14 اہلکار تعینات ہیں۔دستاویزات کے مطابق تحریک انصاف کے ایم این ایز پر سرکاری مراعات کی مد میں 50 کروڑ ماہانہ خرچ ہو رہا ہے۔