اسلام آباد(این این آئی)اسلام آباد میں31دسمبر کو بلدیاتی الیکشن رکوانے کی درخوست اسلام آباد ہائیکورٹ میں دائر کردی گئی۔درخواست میں موقف اپنایا گیا ہے کہ وفاقی حکومت کی جانب سے یونین کونسلز کی تعداد101سے بڑھا کر125کردی گئی ہے
جبکہ الیکشن کمیشن کا نوٹیفکیشن 101یونین کونسلز کی حد تک تھا۔درخواست میں استدعا کی گئی کہ الیکشن کمیشن کو پرانی ووٹر لسٹ کے مطابق الیکشن کرانے سے روکا جائے۔درخواست میں کہا گیا کہ اب ان101یونین کونسلز کا وجود باقی نہیں رہا۔درخواست کے مطابق وفاقی حکومت نے لوکل گورنمنٹ ایکٹ میں ترامیم بھی تجویز کی ہیں۔درخواست بلدیاتی الیکشن میں ن لیگ کے چیئرمین کے امیدوار شہزاد اورنگزیب نے اسلام آباد ہائی کورٹ میں درخواست دائر کی ہے۔دوسری جانب الیکشن کمیشن نے اسلام آباد کے بلدیاتی انتخابات ملتوی نہ کرنے کا فیصلہ کیا ہے۔اس حوالے سے چیف الیکشن کمشنر کی زیر صدارت اجلاس میں الیکشن کمیشن نے بلدیاتی انتخابات ملتوی نہ کرنے کا فیصلہ کیا اور کہا کہ الیکشن 31 دسمبر کو ہی ہوں گے۔
