لاہور (آئی این پی ) چیئرمین پاکستان تحریک انصاف اور سابق وزیر اعظم عمران خان نے اسمبلیاں تحلیل کرنے کے معاملے پر آئینی ماہرین سے قانونی مشاورت مکمل کر لی۔

تفصیلات کے مطابق پنجاب اور خیبر پختونخوا کی اسمبلیاں تحلیل کرنے کے معاملے پر سابق وزیر اعظم عمران خان نے آئینی ماہرین سے قانونی مشاورت مکمل کر لی جس میں آئینی ماہرین کی جانب سے عمران خاں کو تمام قانونی و آئینی معاملات سے آگاہ کر دیا گیا ہے۔ عمران خان نے ماہرین کی رائے کی روشنی میں آئندہ کا لائحہ عمل طے کر لیا۔ انہوں نے قانونی ماہرین سے مختلف قانونی سقم پر سوالات بھی پوچھے۔ قانونی ماہرین کی رائے کے مطابق ایک مرتبہ جب اسمبلی کی تحلیل پر سمری گورنر کے سپرد کی جائے تو گورنر اسے روک نہیں سکتا۔ آئین کے تحت گورنر کو سمری موصول ہونے کے 48 گھنٹوں میں اسمبلی خود بخود تحلیل ہو جاتی ہے۔ چیئرمین پی ٹی آئی عمران خان نے 3 ہفتوں سے زائد اسمبلیوں کی تحلیل پر مختلف قانونی ماہرین سے بھی مشاورت کی۔ عمران خان 17 دسمبر کو لبرٹی چوک میں اسمبلیاں تحلیل کرنے اور دیگر معاملات پر اہم اعلانات کریں گے۔

موضوعات:مشاورت