دوحہ ( این این آئی) ارجنٹینا کے کپتان لیونل میسی نے ورلڈکپ میں سب سے زیادہ میچ کھیلنے کا ریکارڈ برابر کردیا۔لیونل میسی پانچویں مرتبہ ورلڈکپ میں کھیل رہے ہیں اور انہوں نے ارجنٹائن کے لیے 25 میچ کھیل لیے ہیں۔اس سے قبل یہ ریکارڈ جرمنی کے لوتھر میتھاس کے پاس تھا۔دوسری جانب لیونل میسی نے جو ریکارڈ برابر کیا ان کے پاس اتوار کو اسے توڑنے کا موقع بھی ہوگا۔ورلڈ کپ کے دوسرے سیمی فائنل میں فرانس کا مقابلہ مراکش سے (جمعرات ) رات 12بجے ہوگا، جیتنے والی ٹیم اتوار کے روز فائنل میں ارجنٹینا سے مدمقابل ہوگی۔اس کے علاوہ لیونل میسی ورلڈکپ میں ارجنٹینا کے لیے 11گول کرنے والے پہلے پلیئر بھی بن گئے ہیں، انہوں نے سابق کھلاڑی بیٹسٹوٹا کا ریکارڈ توڑا ہے۔فٹبال ورلڈ کے سیمی فائنل میں کروشیا کے خلاف ارجنٹینا کے 2 گول جولین ایلوریز اور 1 گول میسی نے اسکور کیا تھا۔