اسلام آباد (این این آئی)حکومت نے پی ٹی آئی لانگ مارچ سے نمٹنے کیلئے پلان بنا لیا، آزادی مارچ کے پیش نظر انتظامیہ الرٹ رہی، اسلام آباد کے اہم مقامات پر کنٹینرز پہنچا دیئے گئے۔تفصیلات کے مطابق پی ٹی آئی کو فیض آباد کے قریب دھرنے کی اجازت سے متعلق راولپنڈی انتظامیہ نے 56 نکات پر مشتمل اجازت نامہ جاری کردیا،
اس سلسلے میں جاری نوٹیفکیشن میں کہا گیا کہ برطانیہ کی کرکٹ ٹیم کھیلنے کے لیے راولپنڈی پہنچ رہی ہے لہذا جلسہ کرنے کے بعد جگہ کو مکمل طور پر خالی کیا جائے گا۔نوٹیفکیشن میں راولپنڈی پولیس کو جلسے کیلئے تمام ضروری سکیورٹی اقدامات کرنے کے احکامات بھی جاری کیے گئے ،وضاحت کی گئی ہے کہ چیئرمین پی ٹی آئی اسلام آباد انتظامیہ اور سکیورٹی اداروں کی جانب سے طے شدہ راستہ استعمال کریں گے، عمران خان جلسے سے پہلے اور جلسے کے بعد سن روف والی گاڑی بھی استعمال نہیں کریں گے۔اجازت نامے میں ہدایت کی گئی کہ علامہ اقبال پارک کو کارکنان کے رکنے کے لیے استعمال نہیں کیا جائے گا اور پروگرام کے بعد بالکل خالی کر دیا جائے گا، جلسے اور دھرنے کے دوران ریاست مخالف نعرے بازی کی بالکل اجازت نہیں ہوگی، ٹریفک پولیس کی جانب سے جاری ٹریفک پلان پر مکمل طور پر عملدرآمد یقینی بنایا جائے گا۔نوٹیفکیشن میں بتایا گیا کہ کسی بھی ناخوشگوار واقعے یا جانی نقصان کی ذمہ دار جلسہ انتظامیہ ہو گی، جلسے و دھرنے میں ڈرون کیمرے کے استعمال کی بالکل اجازت نہیں ہو گی اور شرائط و ضوابط کی خلاف ورزی پر قانونی کارروائی کی جائے گی۔
