ممبئی (این این آئی)بھارت ریاست کرناٹک کے مشہور اداکار پونیت راجکمار، راجو شری واستو اور سدھارت شکلا کے بعد ایک اور بھارتی اداکار ہارٹ اٹیک سے چل بسا۔

پونیت راجکمار 46سال کی عمر میں گزشتہ برس جم میں ورزش کے دوران ہارٹ اٹیک کے باعث جہاں فانی سے کوچ کرگئے تھے،پونیت راجکمار سے 2ماہ قبل سدھارت شکلا صرف 40برس کی عمر میں حرکت قلب بند ہوجانے کے باعث اپنے مداحوں کو دنیا میں افسردہ چھوڑ گئے تھے۔رواں برس مزاحیہ اداکار راجو شری واستو کو جم میں ورزش کے دوران ہارٹ اٹیک ہوا تھا، انہیں قریبی ہسپتال لے جایا گیا، چند دن کے علاج کے دوران ان کی طبیعت نہیں سنبھلی اور وہ بھی دنیا سے چل بسے۔آج بھارتی میڈیا سے خبر آئی ہے کہ مشہور بھارتی ڈرامے کسوٹی زندگی کی کے 46سالہ اداکار سدھانتھ سوریاونشی کی ہارٹ اٹیک سے موت واقع ہوئی ہے۔رپورٹ کے مطابق سدھانتھ سوریاونشی کو پونیت راجکمار اور راجو شری واستو کی طرح جم میں ورزش کے دوران دل کا دورہ پڑا، انہیں قریبی ہسپتال لے جایا گیا لیکن وہ جانبر نہ ہوسکے۔اداکار نے ممتا، قیامت، ورودھ، کیا دل میں ہے، زمین سے آسمان تک اور کسوٹی زندگی کی جیسے کئی ڈراموں میں اداکاری کے جوہر دکھائے۔