لاہور ( این این آئی) قومی احتساب بیورو (نیب ) نے تحریک انصاف کے مرکزی رہنما و سابق وزیراعلیٰ پنجاب عثمان بزدار کے گرد گھیرا مزید تنگ کر دیا ،نیب نے عثمان بزدار اور فیملی کی جائیدادوں کاریکارڈ طلب کرلیا۔ذرائع کے مطابق نیب کی جانب سے عثمان بزدار ان کی اہلیہ، تین بیٹیوں اور دو بھائیوں کی جائیداد کا ریکارڈ مانگا ہے۔لاہور کی ہائوسنگ سوسائٹیز میں خرید و فروخت کی جانے والی جائیدادوں کے حوالے سے ایل ڈی اے سمیت صوبے بھر کی ڈویلپمنٹ اتھارٹیز کو چھان بین کے احکامات جاری کیے گئے ہیں۔نجی ٹی وی نے ذرائع کے حوالے سے بتایا کہ نیب میں ایکسائز پنجاب کے افسران اور نجی ہوٹل کے مالک کے خلاف شراب لائسنس کی تحقیقات جاری ہیں۔ذرائع کے مطابق عثمان بزدار نے نجی ہوٹل کو شراب کا لائسنس جاری کرنے میں اہم کردار ادا کیا تھا۔