لاہور( این این آئی)تحریک انصاف کے چیئرمین عمران خان نے کہا ہے کہ عوام کا سمندر اسلام آباد آرہا ہے کوئی اس کے سامنے نہیں ٹھہر سکے گا ، قوم فیصلہ کر بیٹھی ہے کہ ان چوروں کی غلامی سے بہتر مر جانا ہے ۔ اچھرہ کے مقام پر لانگ مارچ کے شرکاء سے خطاب کرتے ہوئے عمران خان نے کہا کہ ہم سب سے پہلے آزادی چاہتے ہیں،
ہم اس ملک میں قانون کی حکمرانی چاہتے ہیں ،جنگل کا قانون نہیں چاہتے۔ جب تک ایک معاشرہ قانون اور انصاف کے لئے کھڑا نہیں ہوتا خوشحال نہیںہوتا۔ یہاں سے لوگ برطانیہ یورپ جاتے ہیں حالانکہ یہاں وسائل زیادہ ہیں لیکن وہاں انصاف ہے ،قانون کی حکمرانی ہے ۔وہاں اعظم سواتی یا شہباز گل کو رات کے اندھیرے میں اٹھا کر کوئی تشدد نہیں کر سکتا کیونکہ قانون ان کی حفاظت کرتا ہے ۔ دیہاتوں میںتھانہ کچہری کی سیاست ہے کیونکہ لوگوں کو انصاف نہیں مل رہا ۔ انہوںنے کاہ کہ یہاں سب سے بڑا ظلم یہ ہے کہ جیلیںچھوٹے چوروں سے بھری ہوئی ہیںاور جو ملک کے اربوں روپے چوری کر کے بڑے بڑے محلات میں بیٹھے ہیں انہیں وزیر اعظم بنا دیتا جاتا ہے ۔ حضرت علیؓ نے کہا تھاکہ کفر کا نظام چل جائے گا لیکن نا انصافی اور ظلم کا نظام نہیں چل سکتا۔ انہوں نے کہا کہ جب تک اپنی قوم کو حقیقی طور پر آزاد کر کے حقوق اورانصاف نہیں دلا دیتا، امریکہ کے پٹھوئوں سے آزاد نہیں کر الیتا جدوجہد جاری رکھوں گا، گوالمنڈی میں پیدا ہونے والے آج برطانیہ میں ایسے بیٹھے ہیں جیسے برطانیہ کی ملکہ کے رشتہ دار ہیں ، پیسہ چوری کر کے باہر چلے جاتے ہیں اور این آر او لے کر واپس اور پھر چوری کرکے باہر چلے جاتے ہیں،کیا یہ ہمیں بھیڑ بکریاں سمجھتے ہیں۔ انہوں نے کہا کہ عوام کا سیلاب آرہا ہے کوئی اس کے سامنے نہیں کھڑا ہو اسکتا، یہ قوم فیصلہ کر بیٹھی ہے کہ ان چوروں کی غلامی سے مر جانا بہتر ہے، ہم کبھی ان کو قبول نہیں کریں گے۔ انہوں نے کہا کہ لاہور والوںپاکستان والوںسب تیار ہو جائو یہ وہ وقت ہے کہ ہم اپنے ملک کو اپنی قوم کو حقیقی طور پر آزاد کرائیں اور اس کو وہ ملک بنائیں جو علامہ اقبال کا خواب تھا اور جو میرے لیڈر قائد اعظم کی کی جدوجہد تھی ۔
