کراچی(این این آئی)سندھ پولیس کے 6 ہزار جوان لانگ مارچ روکنے کے لیے اسلام آباد بھیجنے کے معاملے پر پاکستان تحریک انصاف کے رہنما

اور اپوزیشن لیڈر سندھ اسمبلی حلیم عادل شیخ کی جانب سے سندھ ہائی کورٹ میں درخواست دائر کردی گئی۔سندھ ہائی کورٹ میں دائر درخواست میں استدعا کی گئی ہیکہ وفاقی اور سندھ حکومت سمیت آئی جی سندھ کو 6 ہزار اہلکاروں کو واپس بلانے کے احکامات دیے جائیں،

حکومت سندھ اور آئی جی سندھ کو کراچی میں اسٹریٹ کرائم کی روک تھام کے لیے پولیس اہلکاروں کی تعیناتی کا حکم دیا جائے۔

درخواست میں کہا گیا کہ صوبہ سندھ میں سیلاب زدہ علاقوں میں پولیس اہلکاروں کی اشد ضرورت ہے، گزشتہ کچھ ماہ سے کراچی میں اسٹریٹ کرائم میں بھی اصافہ ہوا ہے،

عوام کے تحفظ کے لیے پولیس کی موجودگی ضروری ہے۔حلیم عادل شیخ کی درخواست میں حکومت پاکستان، حکومت سندھ اور آئی جی سندھ کو فریق بنایا گیا ہے۔