لاہور(آئی این پی) پنجاب حکومت نے 98 کروڑ روپے سے زائد مالیت کی 93 نئی گاڑیاں خریدنے کا فیصلہ کر لیا۔ایک نجی ٹی وی نے دستاویزات کے حوالے سے اپنی رپورٹ میں

بتایا کہ پنجاب حکومت کی جانب سے نئی گاڑیاں پنجاب بورڈ آف ریونیو، ڈپٹی کمشنرز اور اے ڈی سی جی ریونیو کے لیے خریدی جائیں گی۔ نئے نامزد کردہ ضلع کوٹ ادو کے اسسٹنٹ کمشنر کے لیے بھی نئی گاڑیاں خریدنے کا فیصلہ کیا گیا ہے۔نئی گاڑیوں کی خریداری کے لیے مجموعی طور پر 98 کروڑ 91 لاکھ 16 ہزار روپے کے فنڈز منظور کیے گئے ہیں اور ڈپٹی کمشنرز کے لیے 53 کروڑ 36 لاکھ روپے مالیت کی 40 فورچیونر گاڑیاں خریدی جائیں گی۔دستاویزات کے مطابق ممبر بورڈ آف ریونیو کے لیے 12 کرولا 5 کروڑ 83 لاکھ 8 ہزار روپے میں خریدی جائیں گی۔ اے ڈی سیز ریونیو اور اے سی کوٹ ادو کے لیے 39 کروڑ 72 لاکھ 8 ہزار روپے مالیت کی 41 ہائی لیکس خریدنے کا فیصلہ کیا گیا۔کابینہ کی اسٹینڈنگ کمیٹی برائے خزانہ گاڑیوں کی خریداری کے لیے فنڈز کی منظوری دے چکی ہے جبکہ محکمہ ریونیو حکومت پنجاب کی جانب سے باقاعدہ مراسلہ جاری کر دیا گیا۔