اسلام آباد (این این آئی)وفاقی وزیرِ داخلہ رانا ثنا ء اللہ نے کہا ہے کہ پی ٹی آئی اپنے ہی دعووں میں پھنس چکی ہے۔ایک انٹرویومیں انہوںنے کہاکہ انہیں اپنی عزت رکھنے کے لیے کچھ نہ کچھ کرنا پڑے گا۔وفاقی وزیرِ داخلہ نے کہا کہ کیا کرنا ہے اس بات پر پی ٹی آئی کی لیڈر شپ بھی ابھی تک متفق نہیں ہوئی ہے۔انہوںنے کہاکہ جتھہ بنانے اور شہروں پر چڑھائی کر کے اپنے مطالبات منوانے کے طریقہ کار کو فروغ نہیں پانے دیں گے، ٹکراو کی پوزیشن کسی کے مفاد میں نہیں ہے۔وزیرِ داخلہ رانا ثنا اللہ نے کہا کہ خیبر پختون خوا اور پنجاب میں پی ٹی آئی کی حکومتیں لوگوں کو گھروں سے نکالنے کے لیے زور لگا رہی تھیں۔انہوں نے کہا کہ عمران خان کی سیاست الیکشن میں ختم ہو جائے گی، ساری دنیا کو چور چور کہنے والا خود چوری میں پکڑا گیا ہے۔