اسلام آباد (این این آئی)پاکستان نے سینئر صحافی ارشد شریف کے قتل کی تحقیقات کیلئے کینیا سے درخواست کردی۔دفتر خارجہ سے جاری بیان میں کہا گیا کہ پاکستان نے ارشد شریف کے قتل کی تحقیقات کے لیے کینیا سے درخواست کی ہے،
وزیراعظم نے کینیا کے صدر ولیم روٹو سے ضابطے کی کارروائی جلد مکمل کرنے کی درخواست کی ہے۔دفتر خارجہ کے مطابق کینیا کے صدر ولیم روٹو نے واقعے پر افسوس کا اظہار کیا ہے۔دفتر خارجہ کے مطابق حکومت پاکستان کینیا کے حکام کے ساتھ ارشد شریف کی میت لانے کیلئے متحرک ہے، نیروبی میں پاکستانی ہائی کمیشن کینیا کی حکومت سے اس عمل کو تیز کرنے کیلئے رابطے میں ہے۔دفتر خارجہ کے مطابق اسلام آباد میں قائم مقام سیکرٹری خارجہ رضا بشیر نے کینیا کے ہائی کمشنر سے ملاقات کی اور انہیں واقعے کی اہمیت سے آگاہ کیا، قائم مقام سیکرٹری خارجہ نے ارشد شریف کی میت جلد بھجوانے کی درخواست کی، قائم مقام سیکرٹری خارجہ نے قومی اسمبلی کی خارجہ کمیٹی کو بھی اس معاملے پر بریفنگ دی۔
