اسلام آباد (مانیٹرنگ ڈیسک)الیکشن کمیشن آف پاکستان نے این اے 95 میانوالی سے چیئرمین تحریک انصاف عمران خان کو ڈی نوٹیفائی قرار دے دیا ہے۔نجی ٹی وی اے آر وائی نیوز کے مطابق الیکشن کمیشن نے این اے 95 کے حلقہ کی نشست کو خالی قرار دیتے ہوئے عمران خان کو ڈی نوٹیفائی کر دیا ہے۔الیکشن کمیشن نے عمران خان کو توشہ خانہ کیس میں نااہل قرار دینے کے بعد ڈی نوٹیفائی کیا اور اس سے متعلق نوٹیفکیشن بھی جاری کردیا ہے۔الیکشن کمیشن کی جانب سے اس خالی نشست پر انتخابی شیڈول جاری کیا جائے گا اور 60 دن کے اندر انتخاب کروانے کا پابند ہوگا۔