اسلام آباد(آن لائن)وزیراعظم شہباز شریف اور چوہدری شجاعت کی ملاقات کی اندرونی کہانی سامنے آگئی ،مہنگائی ،آرمی چیف کی تقرری ،ڈالر اور ڈارکاتذکرہ محو گفتگو رہا۔مہنگائی کم کر دیں میری صحت بہترہوجائے گی ،وزیر اعظم کا صحت دریافت کرنے پر چوہدری شجاعت کا چٹکلہ۔تفصیل کے مطابق وزیر اعظم شہباز شریف نے گزشتہ روز مسلم لیگ(ق) کے

صدر چوہدری شجاعت سے ملاقات کی جس کی اندرونی کہانی سامنے آئی ہے ،وزیر اعظم نے چوہدری شجاعت سے ان کی صحت بارے دریافت کیا تو اس پر ق لیگ کے صدر نے مسکراتے ہوئے کہا کہ آپ مہنگائی کم کردیں میری صحت مزید بہتر ہوجائے گی ،اس پر وزیر اعظم نے کہا کہ اسحاق ڈار صاحب واپس آگئے ہیں انہوں نے آتے ہی ڈالر کی قیمت کم کردی اب مہنگائی کم کرنے پر توجہ دی جارہی ہے ،چوہدری شجاعت نے کہا کہ ویسے بھی ڈالر اور ڈار کے جوڑ کی باتیں عام ہیں،وزیراعظم صاحب آپ کے ساتھ کھڑے ہیں مگر عوام کو ریلیف دیں،تیل کی قیمتوں میں کمی لائیںکھانے پینے کی اشیاء کی قیمتیں بھی کم کریں۔ملاقات کی اندرونی کہانی میں وزیر اعظم شہباز شریف نے آرمی چیف کی تقرری پر بات چیت کی جس پر چوہدری شجاعت نے مشورہ دیا کہ یہ حساس اور قومی ذمہ داری والا معاملہ ہے کسی کی نہ سنیں آئین اور قانون کے مطابق فیصلہ کریں ،جس پر وزیر اعظم نے جواب دیتے ہوئے کہا کہ چوہدری شجاعت صاحب آپ نے میرے دل کے مطابق بات کی ہے بالکل ایسا ہی ہوگا،چوہدری شجاعت نے مزید کہا کہ آپ خود کو خادم پاکستان کہتے ہیں بس چاپلوسی سے بچیں انا نہیں ہونی چاہیے،اس پر وزیر اعظم نے کہا کہ اس لئے تو ہم آپ کے پاس آتے ہیں ،اچھے مشورے مل جاتے ہیں اور اس پر عملدرآمد کی بھی پوری کوشش کرتے ہیں آپ کی رائے ہمیشہ عوامی ہوتی ہے ۔جس پر چوہدری شجاعت نے شہباز شریف کا شکریہ ادا کیا ۔