پشاور(نیوزڈیسک)پھرتحریک انصاف نے بازی مارلی،خیبرپختونخوا مےں بلدیاتی انتخابات کاآخری مرحلہ مکمل ہوگیا ہے ، تحریک انصاف کے ارباب عاصم پشاورکے بلا مقابلہ ضلعی ناظم جبکہ سید قاسم علی شاہ نائب ناظم منتخب ہو گئے ، نوشہرہ سے وزیراعلیٰ خیبر پختونخوا پرویز خٹک کے بھائی لیاقت خٹک ضلعی ناظم بن گئے۔پشاور سمیت خیبرپختونخوا کے بلدیاتی انتخابات کا آخری مرحلہ مکمل ہوگیا۔ بنوں میں اسلام آبادہائی کورٹ کے فیصلے کے باعث ضلعی اور تحصیل ناظمین کے لیے انتخابات نہ ہوسکے۔ صوبے کے بیشتر اضلاع میں تحریک انصاف کو کامیابی حاصل ہوئی ۔پشاور میں انتخابا ت کا عمل کورم پورا نہ ہونے اور تحریک انصاف کے امیدواروں میں ضلعی ناظم کے ٹکٹ پر گروپ بندی کے باعث ووٹنگ کا عمل تاخیر سے شروع ہوا۔ پشاور کے ضلعی ناظم کے لئے ووٹنگ شروع ہونے سے قبل ہی پاکستان مسلم لیگ (ن) کے امیدوار رحم دلنواز اور پی ٹی آئی کے آزاد حیثیت میں نظامت کے امیدوار یونس ظہیر دستبردار ہو گئے جس کے باعث تحریک انصاف کے ارباب عاصم خان بلا مقابلہ ضلعی ناظم پشاور منتخب ہو گئے۔ چارسدہ میں تحریک انصاف کے فہد خان ضلعی ناظم اور جماعت اسلامی کے مصورشاہ نائب ناظم منتخب ہوگئے۔ نوشہرہ میں وزیرپرویزخٹک کے بھائی لیاقت خٹک ناظم اور اشفاق احمد نائب ناظم چن لیے گئے ہیں۔ کوہاٹ سے جے یوآئی کے مولانا نیاز محمدضلعی ناظم اور ن لیگ کے عبدالرشید نائب ناظم بن گئے۔ ضلع کرک سے تحریک انصاف کے ڈاکٹر محمد ناظم ضلعی ناظم اور سجاد نائب ناظم منتخب ہوگئے۔ چترال سے جماعت اسلامی کے حاجی مغفرت شاہ ضلعی ناظم اور جے یو آئی(ف)کے عبدالرحمان نائب ناظم منتخب ہوگئے۔ٹانک سے پی ٹی آئی کے مصطفیٰ خان کنڈی ضلعی ناظم منتخب ہو گئے۔اسی طرح سوات سے ن لیگ کے امیدوارمحمدعلی شاہ خان ضلعی ناظم اور اےاین پی کے عبدالجبار خان ضلعی نائب ناظم منتخب ہوئے۔ہری پور سے پی ٹی آئی کے امیدوارعادل اسلام 53 ووٹ لےکر ڈسٹرکٹ ناظم منتخب ہوگئے اور اسی طرح خیبرپختونخوا مےں آخر کار بلدیاتی انتخابات کاآخری مرحلہ بھی مکمل ہوگیا ۔