لاہور(این این آئی) قومی کرکٹ ٹیم کے سابق کپتان شاہد آفریدی نے کہا ہے کہ پاکستان کو ٹی ٹونٹی ورلڈکپ کیلئے ہاردک پانڈیا جیسے آل رائونڈر کی ضرورت ہے۔سابق کپتان نے اپنے ایک انٹرویو میں کہا کہ قومی اسکواڈ کے پاس خوشدل شاہ، آصف علی، محمد نواز اور شاداب خان جیسے کرکٹر موجود ہیں لیکن ان میں کوئی بھی ہاردک پانڈیا کی طرح مستقل مزاج نہیں، جس طرح وہ بھارت کیلئے پرفارم کررہا ہے۔انہوں نے کہا کہ قومی ٹیم کے پاس میچ فنشر نہیں ہے، ہم سمجھتے ہیں کہ خوشدل اور آصف علی ایسا کرنے کی اہلیت رکھتے ہیں لیکن وہ اب تک خود کو ثابت کرنے میں ناکام رہے ہیں۔شاہد آفریدی نے تجویز دی کہ انگلینڈ کے خلاف ہوم سیریز میں نوجوان کرکٹر عامر جمال کو موقع دینا چاہیئے، وہ آل رانڈر ہیں لیکن انہیں نہیں کھلایا جارہا۔ عامر سے بولنگ اور بیٹنگ کروانی چاہیے تاکہ ہمیں پتہ چل سکے کہ عامر جمال کس قسم کا کھلاڑی ہے۔