راولپنڈی ،کراچی (این این آئی) سابق پاکستانی فاسٹ بالر شعیب اختر نے پاکستانی ٹیم کی جیت پر افغان شائقین کے رویے افسوس کا اظہار کرتے ہوئے کہا ہے کہ افغان شائقین کرکٹ ماضی میں بھی ایسا متعدد بار کر چکے ہیں۔انہوں نے کہا کہ یہ ایک کھیل ہے جسے اس کی روح کے
مطابق کھیلا جانا چاہیے، اگر افغانستان کو کھیلوں میں ترقی کرنی ہے تو ان کے عوام اور شائقین دونوں کو چند چیزیں سیکھنا ہوں گی۔دوسری جانب قومی ٹیم کے سابق کپتان شاہد آفریدی نے افغانستان کے خلاف کامیابی پر تبصرہ کرتے ہوئے کہا ہے کہ میچ اتنا کلوز نہیں ہونا چاہیے تھا۔تفصیلات کے مطابق پاکستان نے سنسنی خیز مقابلے کے بعد افغانستان کو ایشیا کپ میں شکست دے کر فائنل میں جگہ بنالی ۔میچ کے آخری لمحات میں افغانستان کو جیت کیلئے صرف ایک وکٹ درکار تھی لیکن ٹیل اینڈر نسیم شاہ نے یکے بعد دیگرے دو چھکے لگاکر پاکستان کو ناقابل یقین فتح دلادی۔میچ ختم ہوتے ہی پاکستان کرکٹ ٹیم کے سابق کپتان شاہد خان آفریدی نے بھی ٹوئٹ کی۔ اپنی ٹوئٹ میں انہوں نے نسیم شاہ کو شاباشی دی۔شاہد آفریدی نے کہا کہ پاکستان کیلئے میچ اتنا کلوز ہونا نہیں چاہیے تھا لیکن اختتام اچھا تو سب اچھا، ہر کھلاڑی کی انفرادی کارکردگی ٹیم کے کام آئی، ویلڈن بوائز اور مبارک۔آخر میں شاہد آفریدی نے نسیم شاہ کو بوم بوم کا خطاب بھی دے ڈالا۔
