شارجہ (این این آئی)قومی کرکٹ ٹیم کے تیزی سے ابھرتے کھلاڑی نسیم شاہ نے اپنی جیت کو قوم کے نام کر دیا ۔تفصیلات کے مطابق ایشیا کپ 2022 میں افغانستان کے خلاف پاکستان کو آخری اوور میں یادگار چھکوں کے ذریعے فتح دلوانے والے نسیم شاہ نے جیت کے بعد

سوشل میڈیا پر ایک پیغام شیئر کیا۔اپنے ٹوئٹ میں نسیم شاہ نے کہا کہ یہ جیت ان سب لوگوں کے نام جو ہمیشہ سپورٹ کرتے ہیں، آپ سب کی دعائوں کا بہت شکریہ!واضح رہے کہ افغانستان کے خلاف جیت کے بعد میڈیا سے گفتگو کے دوران نسیم شاہ کا کہنا تھا کہ ابھی تو سب یہ بھول گئے ہوں گے کہ میں ایک بولر ہوں، بیٹنگ پر آیا تھا تو معلوم تھا کہ چھکے لگا سکتا ہوں۔نسیم شاہ نے کہا کہ کوشش کی اور کامیاب ہوگیا، یقین تھا کہ کرلوں گا کافی پریکٹس کرتے رہتے ہیں۔دوسری جانب ایشیا کپ سپر فور مرحلے کے میچ میں پاکستان نے نسیم شاہ کے آخری دو چھکوں کی بدولت افغانستان کو شکست دے دی، معروف سوشل میڈیا انفلوئنسر مومن ثاقب نے نسیم شاہ کو دلچسپ انداز میں خراج تحسین پیش کیا ہے۔مومن ثاقب نے میچ پر تبصرہ کرتے ہوئے اپنی ویڈیو میں کہا کہ نسیم شاہ نے آخری دو چھکے مار کر ٹیم کو جتوانے میں اہم کردار ادا کیا، نسیم شاہ ہمارا شہزادہ ہے۔انہوں نے کہا کہ نسیم شاہ کو میں گفٹ کے طور پر پلاٹ اور اپنا گردہ دیتا ہوں۔مومن ثاقب نے کہا کہ نسیم شاہ میں جاوید میانداد کی روح آگئی، انہوں نے شارجہ اسٹیڈیم میں جاوید میانداد کے بعد چھکے مار کر ٹیم کو جتوایا، وہ نسیم شاہ نہیں بلکہ نسیم میانداد ہیں۔