لاہور،اسلام آباد( این این آئی، آن لائن) سابق وزیر داخلہ شیخ رشید احمد نے کہا ہے کہ آئی ایم ایف کو معلوم ہے کہ پاکستان میں حکومت کی کمزوراکثریت ہے اورلوگ سڑکوں پر آسکتے ہیں۔ٹوئٹر پر جاری بیان میں شیخ رشید احمد نے کہا کہ پیٹرول اوربجلی مزیدمہنگی ہونے جارہی ہے۔

وہ وقت دورنہیں جب کارخانیں اوردکانیں بندہوں گی اور لوگ سڑکوں پرہوں گے۔انہوںنے کہا کہ سیلاب سیاسی پوائنٹ اسکورنگ بن گیا ہے، ڈالر3روپے اوربڑھ گیاہے،دوست ممالک سرمایہ کاری کی بات کررہے ہیں،کیش کی نہیں۔دوسری جانب وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ اس وقت ملک کا ایک تہائی حصہ زیر آب ہے، 80 اضلاع آفت زدہ قرار دئے گئے ہیںلیکن عمران خان سیلاب متاثرین کو نہیں، اپنا بیانیہ زندہ رکھنے کے مشن پر ہیں۔ہفتہ کے روز اپنے ایک بیان میں انہوں نے کہا کہ ملک میں 33 ملین سے زائد لوگ متاثر، 1265 لوگ جاں بحق، 14 لاکھ سے زائد گھر تباہ ہوئے ہیں مگر عمران خان جلسوں میں مصروف ہیں، لاکھوں لوگ کھلے آسمان تلے امداد کے منتظر ہیں لیکن عمران خان کہتے ہیں وہ قوم کو انقلاب کے لئے جگا رہے،عمران خان صرف سندھ اور بلوچستان کو نہیں بلکہ پنجاب اور کے پی کے سیلاب زدگان کو بھی پیغام دے رہے ہیں کہ ان کو بس اپنی سیاست سے غرض ہے،ان کو عوام کی مشکلات اور زندگیوں سے کوئی سروکار نہیں،سندھ اور بلوچستان میں نا صحیح ان کو پنجاب اور خیبر پختونخواہ میں سیلاب متاثرین کی امداد پر توجہ دینی چاہئے۔

موضوعات:شیخ رشید