کراچی(این این آئی)پی ٹی آئی کے مرکزی سیکرٹری جنرل اسد عمر نے کہاہے کہ پاکستان کے فیصلے کراچی میں ہونگے واشنگٹن میں نہیں ہونگے۔وہ اتوارکوکراچی کے علاقے سعود آباد میں پاکستان تحریک انصاف کے ماڈل ٹائون آفس کی افتتاحی تقریب سے خطاب کررہے تھے۔انہوں نے کہا کہ یہ کوئی عام انتخابات نہیں ہیں، اس بار ووٹ اہم ہوگا۔انہوں نے کہا کہ غلامی کرنے کو قوم تیار نہیں ہے،
سب سمجھدار ہوگئے ہیں، کسی بھی عقیدہ کے ماننے والے ہو، عمران خان کو ووٹ دیں گے۔اسد عمر نے کہا کہ سندھ میں کئی بار سیلاب آچکا ہے لیکن عوام پر پیسے نہیں لگائے، جب بھی سیلاب یا تباہ کاری آتی ہے، سندھ میں نقصانات ہوجاتے ہیں۔انہوں نے کہاکہ مقامی حکومت کا کام ہے سڑکیں بنائے لیکن ایسا ہوتا نہیں ہے، خیبر پختونخواہ میں مالی نقصان ضرور ہوا ہے لیکن جانی نقصان نہیں ہوا جبکہ ہدایات دے دی گئی ہے اب سندھ اور بلوچستان میں بھی کام ہم کریں گے۔پی ٹی آئی کے مرکزی سیکرٹری جنرل نے کہاکہ جب ہم نے وفاق کا پیسہ کراچی کے لئے مختص کیا، تو ہم سے سوال کیے گئے ، ایم کیو ایم سمیت متعدد جماعتوں نے کراچی میں سوائے بینر لگانے کے کچھ نہ کیا۔اسد عمر نے کہا کہ مئی کے مہینے میں مردم شماری کا پائلٹ سروے ہونا تھا، ہم سے درخواست کی تھی، مردم شماری کے پانچ ارب روپے کہاں گئے؟ کراچی کے لیے ایم کیو ایم والے آواز کیوں نہیں اٹھاتے ہیں؟ پیپلز پارٹی سے ہاتھ ملا کے ایم کیو ایم نے کراچی کو بیچ دیا کیا ؟۔انہوںنے کہاکہ عمران خان، اسد عمر سمیت متعدد امیدوار کراچی سے منتخب ہوئے، ایم کیو ایم نے خنجر گھونپا لیکن اب پاکستان کے فیصلے کراچی میں ہونگے واشنگٹن میں نہیں ہونگے۔
