اسلام آباد (این این آئی)وفاقی وزیر صنعت و پیداوار سید مرتضیٰ محمودنے کہا ہے کہ ہائبرڈ اور الیکٹرک گاڑیوں سمیت جدید ٹیکنالوجیز میں سرمایہ کاری کی کوششیں قابل تعریف ہیں۔
ان خیالات کا اظہار انہوں نے جمعرات کو آٹو انڈسٹری، ڈویلپمنٹ اینڈ ایکسپورٹ پالیسی کے حوالہ سے منعقدہ اجلاس کی صدارت کرتے ہوئے کیا۔ اجلاس میں پالیسی سازی، قیمتوں میں کمی، برآمدات کے فروغ، لوکلائزیشن اور درآمدات میں اضافہ پر بھی غور کیا گیا۔
وفاقی وزیر نے کہا کہ ہائبرڈ اور الیکٹرک گاڑیوں سمیت جدید ٹیکنالوجیز میں سرمایہ کاری کی کوششیں قابل تعریف ہیں،
ڈالر کی قیمت میں کمی کے پیش نظر مینوفیکچررز سے گاڑیوں کی قیمتیں کم کرنے کا کہا ہے۔ انہوں نے کہا کہ مقامی مینوفیکچرنگ انڈسٹری انجینئرز،
ٹیکنیشنز، ہنر مند اور نیم ہنر مند پیشہ ور ہزاروں افراد کو روزگار دے رہی ہے۔اجلاس میں گاڑیاں بنانے والے اداروں، پارٹس سپلائی کرنے والوں، سرکاری افسران اور صارفین کے نمائندوں نے شرکت کی۔
