لاہور( این این آئی)نجی شعبے کے زیر انتظام چلنے والی مسافر ٹرین تیز گام میں ڈانس کی محفل سجائے جانے کی ویڈیو وائرل ہو گئی ،وفاقی وزیر ریلوے خواجہ سعد رفیق نے واقعہ کا سختی سے نوٹس لیتے ہوئے تحقیقات کا حکم دیدیا جبکہ وفاقی وزیر نے واضح کہا ہے کہ
مناسب جواب نہ ملنے پر آپریٹر کا لائسنس کینسل کر دیا جائے گا۔ تفصیلات کے مطابق گزشتہ روز سوشل میڈیا پر چلتی ٹرین میں رقص کرنے کی ویڈیو وائرل ہوگئی جس کے بعد ریلوے انتظامیہ حرکت میں آگئی ۔ویڈیو میں دیکھا جاسکتا ہے کہ نجی شعبے کے تحت چلنے والی وی آئی پی ٹرین تیز گام میں ڈانس کی محفل سجائی گئی ہے ۔ ڈانس کی محفل ٹرین کے ڈائننگ کار میں سجائی گئی اور پنجابی گانوں پر خواجہ سرائوں نے ڈانس آئٹم پیش کئے ۔ ترجمان ریلوے کے مطابق وفاقی وزیر ریلوے تیزگام کی ڈائننگ کار میں ڈانس کے واقعے کا سختی سے نوٹس لیا ہے ۔ ترجمان کے مطابق ذمہ داران کو قرار واقعی سزا دی جائے گی۔ ترجمان کے مطابق ٹرین کی کمرشل مینجمنٹ پرائیویٹ آپریٹر کے پاس ہے جس کو شوکاز نوٹس جاری کر دیا گیا ہے،مناسب جواب نہ دینے پر آپریٹر کا لائسنس کینسل کر دیا جائے گا۔
