اسلام آباد (مانیٹرنگ ڈیسک )تحریک انصاف کے چیئرمین و سابق وزیراعظم عمران خان نے الیکشن کمیشن سے پارٹی کیخلاف ممنوعہ فنڈنگ کیس پر فیصلہ آنے پر قانونی ٹیم کو طلب کر لیا ہے ، لیگل ٹیم سے مشاورت کے بعد تحریک انصاف آئندہ کی حکمت عملی اپنائے گی

،یہ قانونی ٹیم چیئرمین پی ٹی آئی اور دیگر پارٹی قائدین کو ممنوعہ فنڈنگ کیس اور الیکشن کمیشن کے فیصلے پر تفصیلی بریفنگ دے گی ، جس کے بعد عمران خان قانونی ٹیم کو آئندہ کی حکمت عملی کے بارے میں آگاہ کریں گے۔دوسری جانب رہنما تحریک انصاف فواد چودھری کا کہنا ہے کہ پی ٹی آئی پاکستان کی واحد جماعت ہے جس کو پبلک فنڈنگ کرتی ہے، سمجھ نہیں آتی کہ ن لیگ اور پیپلز پارٹی نے اوورسیز کودشمن کیوں سمجھ لیا ۔میڈیا سے بات کرتے ہوئے فواد چودھری نے کہا کہ کیا یہ کیس فارن فنڈنگ کا تھا؟ یہ بھی اس نتیجے پر پہنچے ہیں کہ فارن فنڈنگ نہیں تھی۔ نجی ٹی وی ہم نیوز کے مطابق اب اگلا مرحلہ شروع ہوگا، ہم بتائیں گے کہ یہ16 اکاؤنٹس بھی قانونی ہیں، پی ٹی آئی سمیت کسی جماعت کو حق نہیں کہ وہ اپنی فنڈنگ عوام سے چھپائیں، عمران خان کو آڈٹڈ اکاؤنس ملے، میرا آڈیٹر کہہ رہا ہے کہ سارے اکاؤنٹس لیگل ہیں، مس ڈکلیئریشن کے معاملے کو ہم دیکھ رہے اس کا جواب ہم دیں گے۔سابق وفاقی وزیر نے مزید کہا کہ ہم الیکشن کمیشن کا فیصلہ چیلنج کریں گے، خطرہ جماعتوں کو یہ ہوتا ہے کہ عوام میں مقبولیت نہ کھو دیں، عوام میں مقبولیت کھونے کا یہ خطرہ ن لیگ اور پیپلز پارٹی کو ہے، فضل الرحمان کی فنڈنگ نکالیں گے تو پتہ چلے گا کہ فارن فنڈنگ کیا ہوتی ہے۔