اسلام آباد(آن لائن)سابق وزیراعظم شاہد خاقان عباسی نے کہا ہے کہ عمران خان الیکشن کمیشن میں اپنے خلاف ممنوعہ فنڈنگ کیس میں 8 سال کوئی ثبوت پیش نہ کرسکے۔ عمران خان نے 150 کروڑ روپے ناجائز ذرائع سے وصول کئے۔ حکومت پاکستان اور قانون اپنا راستہ خود اختیار کریں گے۔

ان خیالات کا اظہار انھوں نے گزشتہ روز اسلام آباد میں پریس کانفرنس میں کیا۔ انھوں نے یہ بھی کہا کہ ہم چاہتے تھے حقائق قوم کے سامنے آئیں جو آج الیکشن کمیشن نے دیدئیے ہیں ہم نے کسی پر الزام نہیں لگایا نہ کسی کو جیل میں ڈالا۔ اب عمران خان کو جیل میں ڈالا جائے اتنا تو بنتا ہے ۔ انہوں نے کہا عدالت اور قانون اپنا راستہ لے گی سپریم کورٹ کا فیصلہ تھا کہ نواز شریف نے اپنے بیٹے کی کمپنی سے رقم نہیں لی تو وہ صادق اور امین نہیں رہے الیکشن کمیشن نے واضح رپورٹ دیدی ہے جہاں ہوا حکومت کارروائی کرے گی انہوں نے کہا وہ شخص جس کی سیاست اس پر ہوتی ہے کہ دوسرے چور ہیں آج یہ ثابت ہوگیا کہ آج سب سے بڑا چور عمران خان اور اسکی جماعت ہے۔150 کروڑ روپیہ عمران خان نے ناجائز ذرائع سے حاصل کیے جسکی پاکستان کا قانون اجازت نہیں دیتا یہ رقم عمران خان نے ممنوعہ ذرائع سے حاصل کی اس میں اسرائیلی اور بھارتی شہری بھی شامل ہیں۔ دوسروں پر غداری کا الزام لگانے والے بتائیں وہ کس کے لئے کام کررہے ہیں۔