میڈرڈ (این این آئی)اسپین میں گرمی کے ستائے عوام نے پکنک منانے کے لیے ساحل کا رخ کیا تو اسی دوران نوجوان سمندر کی لہروں میں پھنس گیا جسے ڈرون کے ذریعے بچایا گیا۔میڈیارپورٹس کے مطابق ویڈیو میں دیکھا جاسکتا ہے کہ ایک نوجوان لڑکا سمندر کی لہروں میں پھنسا ہوا ہے جسے فوری طور پر بچانے کے لیے لائف گارڈ نے ریسکیو ڈرون میں لائف جیکٹ ڈال کر اڑایا اور ڈوبنے والے لڑکے کی طرف روانہ کر دیا۔اس کے فوری بعد لائف گارڈ نے ریسکیو بوٹ میں بیٹھ کر لڑکے کو سمندر سے نکالا، جسے فوری طور پر طبی امداد کے لیے اسپتال منتقل کیا گیا۔اس تمام ریسکیو آپریشن کو ڈرون میں نصب کیمرے سے فلمایا بھی گیا۔اسپین میں پہلا ریسکیو ڈرون آپریشن 2017 میں کیا گیا تھا جس کی کامیابی کے بعد اسپین کے 22 ساحلی مقامات پر 30 کے قریب ڈرون ریسکیو خدمات انجام دے رہے ہیں۔