راولپنڈی (آن لائن) ترجمان پاک فوج نے کہا ہے کہ ملک کے مختلف حصوں میں حالیہ بارشوں اور سیلاب سے متاثرہ علاقوں میں بچاؤ اور امدادی سرگرمیوں میں سول انتظامیہ کی بھرپور مدد کر رہے ہیں،ایمرجنسی ریسپانس ٹیمیں متاثرہ آبادی کو پینے کے صاف پانی کی

فراہمی اور بنیادی غذائی ضروریات کے علاوہ طبی امداد فراہم کرنے میں مسلسل مصروف ہیں۔ ترجمان پاک فوج کے مطابق پاک فوج کی ڈی واٹرنگ ٹیمیں ضلع جامشورو، گھارو گرڈ سٹیشن اور جنوبی کراچی سمیت شاہراہ فیصل اور نیپا چورنگی، لسبیلہ، تربت اور کوئٹہ میں سیلاب متا ثرین کی معاونت کے لئے امدادی کارروائیاں کر رہی ہیں۔ مذکورہ علاقوں میں پاک فوج کی ٹیموں نے طبی سہولیات سمیت ریلیف کیمپ قائم کیے اور مقامی رہائشیوں میں ضروری خوراک اور راشن تقسیم کیا۔ ترجمان کے مطابق امدادی سرگرمیوں اور سیلاب کی وجہ سے کسی بھی ہنگامی صورتحال سے نمٹنے کے لیے مختلف اسٹینڈ بائی اور رسپانس ٹیمیں سندھ اور بلوچستان کے مختلف مقامات پر تعینات ہیں۔ پاک فوج کے دستوں اور موبائل میڈیکل ٹیموں نے جامشورو، گھارو، کیماڑی اور نیپا چورنگی کے علاقوں میں بھی سینکڑوں مقامی لوگوں کو امدادی سامان اور مفت ادویات فراہم کیں۔ اس کے علاوہ، طبی ٹیم نے بلوچستان کے کوئٹہ، تربت اور لسبیلہ میں بھی 1500 سے زائد افراد کو طبی امداد فراہم کی۔