اسلام آباد (این این آئی)موبائل فون انٹرنیٹ اسپیڈ میں پاکستان نے بھارت کو پیچھے چھوڑ دیا ہے۔دنیا بھر میں انٹرنیٹ اسپیڈ کی میپنگ کرنے والے ادارے اوکلا (Ookla) نے جون 2022 میں مختلف ممالک میں موبائل اور براڈ بینڈ انٹرنیٹ اسپیڈ کی فہرست جاری کی۔فہرست کے

مطابق ناروے، متحدہ عرب امارات اور بلغاریہ میں موبائل انٹرنیٹ اسپیڈ دنیا میں سب سے زیادہ ہے۔موبائل انٹرنیٹ کی فہرست میں ناروے 126.96 ایم بی پی ایس کی اوسط ڈاؤن لوڈ اور 17.91 ایم بی پی ایس کی اوسط اپ لوڈ اسپیڈ کے ساتھ سرفہرست ہے۔دوسرے نمبر پر متحدہ عرب امارات ہے جہاں موبائل انٹرنیٹ کی اوسط رفتار 120.37 ایم بی پی ایس ہے جبکہ بلغاریہ 6 درجے بہتری سے تیسرے نمبر پر پہنچ گیا جہاں موبائل انٹرنیٹ کی اوسط رفتار 110.61 ایم بی پی ایس ہے۔رپورٹ کے مطابق پاکستان 139 ممالک کی اس فہرست میں 3 درجے تنزلی کے بعد 116 ویں نمبر پر پہنچ گیا۔پاکستان میں موبائل انٹرنیٹ ڈاؤن لوڈنگ کی اوسط رفتار 14.63 ایم بی پی ایس اور اپ لوڈ رفتار 9.38 ایم بی پی ایس ہے،پاکستان اس معاملے میں بنگلہ دیش اور بھارت سے آگے ہے، بھارت اس فہرست میں 118 ویں نمبر پر ہے،دوسری جانب براڈ بینڈ انٹرنیٹ اسپیڈ میں لاطینی امریکی ملک چلی سرفہرست ہے،چلی میں براڈ بینڈ انٹرنیٹ کی اوسط رفتار 213.73 ایم بی پی ایس ہے جبکہ سنگاپور 203.61 ایم بی پی ایس کے ساتھ دوسرے اور چین 188.03 ایم بی پی ایس کے ساتھ تیسرے نمبر پر موجود ہے۔182 ممالک کی اس فہرست میں پاکستان 9.82 ایم بی پی ایس براڈ بینڈ اسپیڈ کے ساتھ 150 ویں نمبر پر موجود ہے جبکہ بھارت 48.11 ایم بی پی ایس کے ساتھ 72 ویں نمبر پر ہے۔دنیا بھر میں موبائل انٹرنیٹ ڈاؤن لوڈنگ رفتار اوسطاً 31.01 ایم بی پی ایس اور اپ لوڈنگ اسپیڈ 8.66 ایم بی پی ایس ہے، اس کے مقابلے میں براڈ بینڈ انٹرنیٹ میں عالمی سطح پر ڈاؤن لوڈنگ کی اوسط رفتار 66.25 ایم بی پی ایس اور اپ لوڈنگ اوسط اسپیڈ 28.56 ایم بی پی ایس ہے۔