اسرائیلی صحافی کو مکہ میں داخلے میں مدد فراہم کرنے والا سعودی شہری گرفتار

ریاض (این این آئی)سعودی عرب کی انتظامیہ نے ایک غیر مسلم صحافی کو مکہ مکرمہ میں داخل ہونے میں مدد فراہم کرنے

پر ایک شہری کو گرفتار کرلیا ہے۔عرب ٹی وی کے مطابق پولیس ترجمان نے گرفتاری کی تصدیق کرتے ہوئے بتایا کہ

غیر مسلم صحافی کے پاس امریکی پاسپورٹ تھا۔ترجمان نے کہا کہ پولیس نے صحافی کی مدد کرنے والے شہری کو

گرفتار کرکے اس کا کیس عدالت کو بھیج دیا ہے۔واضح رہے کہ گزشتہ دنوں اسرائیل کے ایک ٹی وی چینل سے تعلق رکھنے

والے صحافی گل تمارے نے ایک ویڈیو پوسٹ کی تھی جس میں دکھایا گیا تھا کہ وہ مکہ مکرمہ میں گھوم رہا ہے۔

حالانکہ مکہ مکرمہ میں غیر مسلم افراد کے داخلے پر پابندی ہے اوراس کی روک تھام کے لیے چیکنگ کا نظام بھی کام کررہا ہے۔

اس رپورٹ میں یہ صحافی کہہ رہا تھا کہ مکہ جانا اس کا خواب تھا اور جو شخص اسے اپنے ساتھ لے جانے کے لیے تیار ہوا اسے علم نہیں تھا کہ وہ ایک اسرائیلی صحافی ہے۔

19 جولائی کو ایک ٹوئٹ میں اسرائیلی صحافی نے کہا کہ اس کا مقصد مسلمانوں کو تکلیف پہنچانا نہیں تھا۔