اسلام آباد(نیوز ڈیسک)نیشنل ایکشن پلان پر حتمی جنگ پنجاب میں لڑی جانے کی تیاری کا اندازہ لگائیے کہ پنجاب پولیس کی سپیشل برانچ کو مچھر پکڑنے پر لگا دیا گیا ہے۔ پولیس کی سپیشل برانچ جو ایک خفیہ ادارے کے طور پر کام کرتی ہے کو مچھر پکڑنے اور اس کی رپورٹس تیار کرکے جلد سے جلد بجھوانے کا بھی حکم ملا ہے اور اس پر پورے پنجاب میں عملدرآمد بھی جاری ہے۔محکمہ پولیس کی دستاویزات کے مطابق آئی جی پنجاب کے حکم پر پولیس کی سپیشل برانچ اپنے اپنے علاقوں میں ڈینگی مچھر کو تلاش کر رہی ہیں۔ اس کے لئے پولیس اہلکاروں کو محکمہ صحت کی طرز کی مہم چلانے اور رپورٹس بجھوانے کی ہدایت کی گئی ہے۔ رپورٹ کے مطابق پنجاب کے تمام اضلاع میں گزشتہ دو ہفتوں سے سپیشل برانچ کے اہلکار نجی عمارتوں، کالونیوں، قبرستانوں، پارکوں اور دیگر مقامات پر جا کر ڈینگی مچھر کو ڈھونڈ رہے ہیں۔ رپورٹ کے مطابق سپیشل برانچ کے اہلکاروں نے اب تک 1 ہزار سے زائد مقامات کو چیک اور 100 سے زائد مقامات پر ڈینگی لاروا کی نشاندہی کی اور مچھر کی پرورش پانے کے مقام ڈھونڈے۔ دلچسپ امر یہ ہے کہ پولیس کی جس برانچ کو جرائم پیشہ افراد اور دہشت گردوں کی کارروائیوں کی پیشگی اطلاع جیسی خبر سرکار اور پولیس کو دینا تھی وہ مچھر پکڑ رہی ہے اور مچھر کی پرورش کے مقامات تلاش کرنا موسٹ امپورٹنٹ قرار دیا گیا ہے۔