سیالکوٹ (این این آئی)وزیر دفاع خواجہ آصف نے کہا ہے کہ پاکستان کے آئینی طریقہ کار پر حملہ ہو رہا ہے۔ ویسٹ واٹر ٹریٹمنٹ پلانٹ کے افتتاح کے موقع پر خطاب کرتے ہوئے خواجہ آصف نے کہا کہ اب اداروں کیخلاف کام شروع ہوگیا ہے، اداروں پر سوالیہ نشان لگایا جارہا۔

انہوں نے کہا کہ عمران خان نے پاکستان کو معاشی طور پر زنجیروں میں باندھ دیا ہے۔ان کا کہنا تھا کہ مستحکم معیشت کے بغیر دفاعی سلامتی بھی خطرے میں پڑ جاتی ہے،انہوں نے کہاکہ عمران خان آج بھگوڑے کی طرح پشاور جا کر بیٹھا ہوا ہے۔ انہوں نے کہاکہ ہم سیاسی فائدہ اٹھانے نہیں آئے۔وفاقی وزیر نے کہا کہ پاکستان تحریک انصاف والے اسمبلی میں آنے کیلئے بے تاب ہیں۔انہوں نے کہاکہ ہمارے لیے ملکی سلامتی اہم ہے۔ انہوں نے کہاکہ منصوبے کے تحت ملکی معیشت تباہ کی گئی،گزشتہ 4 سال سے ملک میں کیا ترقی ہوئی؟ عمران خان ہیلی کاپٹر کا استعمال کرتے ہیں۔وزیر دفاع نے کہاکہ 4 سال پی ٹی آئی والوں نے ہر معاملے پر پیسہ کھایا اور پیسپ پراجیکٹ ہماری گزشتہ حکومت نے شروع کیا، سیورج لائن ڈالنے سے شہریوں کو دشواری کا سامنا ہے اس لیے پہلے اکھاڑی گئی سڑک کی بحالی کی بعد دوسری پر کام شروع کیا جائے۔انہوں نے کہا کہ سیالکوٹ میں ٹریفک کا مستقل حل تلاش کریں گے، برسات کے بعد کھدائی کا کام شروع کیا جائے اور ویسٹ واٹر ٹریٹمنٹ کی تعمیر سے شہریوں کو دقت کا سامنا نہیں کرنا پڑے گا، پاکستان کا معاشی مستقل گروی رکھا گیا لیکن ہم یہ زنجیریں توڑیں گے۔وزیر دفاع نے کہا کہ عمران خان نے پشاور میں پناہ لے رکھی ہے اور عمران خان نے نوجوان نسل کی جو تربیت کی اس پر افسوس ہے۔انہوں نے کہا کہ عمران خان مفت بر ہیں اور ان کے ہاتھ ہمیشہ دوسروں کی جیب میں ہوتے ہیں، جلد بحران سے نکلنے میں کامیاب ہوں گے اور بچہ بچہ ملکی دفاع کے لیے پر عزم ہے۔