لاہور (آن لائن) پاکستان تحریک انصاف کے قائد اور سابق وزیراعظم عمران خان کی جانب سے اسلام آباد کی جانب دوبارہ لانگ مارچ کے عندیے کے بعد پنجاب پولیس نے محکمہ داخلہ پنجاب کی ہدایات کی روشنی میں لانگ مارچ کو روکنے کے سلسلے میں اضافی ہتھیار خریدنے کا فیصلہ کیا ہے۔ بتایا گیا ہے کہ پنجاب پولیس اس مقصد کے لئے 100 آنسو گیس گنیں اور آنسوں گیس کے 5000 شیل سمیت ہزاروں ربڑ کی گولیاں خریدنے کا فیصلہ کیا ہے جبکہ پنجاب حکومت نے نئے ڈی پی او اٹک کو پی ٹی آئی کا ممکنہ لانگ مارچ روکنے کے لئے موثر حکمت عملی اپنانے اور تیاریاں کرنے کی ہدایات جاری کردی ہیں۔ واضح رہے کہ پنجاب حکومت نے پی ٹی آئی کے سابق لانگ مارچ کو دریائے اٹک سے پیچھے روکنے میں ناکامی کے بعد اس وقت تعینات ڈی پی او اٹک کو عہدے سے ہٹا دیا ہے۔