لاہور(آئی این پی ) لاہور پولیس نے بڑی کارروائی کے دوران پی ٹی آئی رہنما کے گھر سے بڑی تعداد میں اسلحہ اور گولہ بارود برآمد کر لیا۔ بتایا گیا ہے کہ برآمد شدہ اسلحے میں 13 ایس ایم جی رائفل، درجنوں پستول اور سیکڑوں گولیاں شامل ہیں۔ ڈی آئی جی آپریشنز لاہور سہیل چودھری نے پریس کانفرنس میں بتایا کہ ہمارے پاس اطلاعات تھی کہ بھاری تعداد میں اسلحہ لاہور لایا جا رہا ہے۔

کل رات موٹروے کے قریب گاڑیوں کا تعاقب کیا گیا جن میں اسلحہ تھا، گاڑیاں ایک نجی سوسائٹی میں جاکر بجاش نیازی کے گھر رکیں۔ پولیس پہنچی تو ملزمان فرار ہو گئے۔ انہوں نے مزید کہا کہ پولیس نے گاڑیوں کی تلاشی لی تو بڑی تعداد میں اسلحہ ملا، یہ اسلحہ لانگ مارچ کیلئے استعمال ہونا تھا، فرار ملزموں کو جلد پکڑ لیں گے۔دوسری جانب ترجمان پنجاب حکومت عطا اللہ تارڑ نے کہا کہ پی ٹی آئی رہنما روپوش ہو گئے ، اب اپنے کارکنوں کو پیغام دے رہے ہیں کہ اسلحہ اکٹھا کریں اور جہاں جہاں بھی ہیں وہاں پر بد امنی پھیلائیں ۔ ایک بیان میں ترجمان پنجاب حکومت نے کہا کہ پنجاب حکومت نے فیصلہ کیا ہے کہ بد امنی کی کوشش کو کامیاب نہیں ہونے دیا جائے گا، وزیر اعلی نے کہا کہ ہم معذرت خواہ ہیں کہ آپ کو مشکلات کا سامنا کرنا پڑا، عمران خان لوگوں کواسلام آباد آنے کیلئے اکسا رہے ہیں، خود وہاں چھپے بیٹھے ہیں جہاں انکی حکومت ہے ۔ عطا اللہ تارڑ نے کہا کہ یہ لوگ سرکاری خرچ پر کرینیں اور ماسک لے کر آ رہے ہیں ، علی امین گنڈا پور ان کے انچارج ہیں ، یہ لوگ ریاست کے خلاف جنگ اور خانہ جنگی چاہتے ہیں ۔